नाशिक (प्रतिनिधी) :– शहर परिसरात काल वेगवेगळ्या तीन ठिकाणांहून दोन मुलींसह दोन बालकांचे अपहरण करण्यात आल्याप्रकरणी पोलीस ठाण्यात नोंद करण्यात आली आहे.
अपहरणाचा पहिला प्रकार आडगाव शिवारात घडला. याबाबत अपहृत मुलीच्या बहिणीने फिर्याद दिली आहे. त्यात म्हटले आहे, की फिर्यादीची बारा वर्षांची बहीण व दहा वर्षांचा लहान मुलगा हे दोघे दि. 16 जुलै रोजी सकाळी 10 वाजता विंचूर गवळी येथील घरी होते. त्यावेळी अज्ञात इसमाने बारा वर्षांची मुलगी व बालक यांना फिर्यादीच्या कायदेशीर रखवालीतून फूस लावून पळवून नेले. या प्रकरणी आडगाव पोलीस ठाण्यात अज्ञात व्यक्‍तीविरुद्ध अपहरणाचा गुन्हा दाखल करण्यात आला असून, पुढील तपास पोलीस उपनिरीक्षक घोरपडे करीत आहेत.
अपहरणाचा दुसरा प्रकार अंबड हद्दीत घडला. याबाबत अपहृत मुलीच्या वडिलांनी फिर्याद दिली आहे. त्यात म्हटले आहे, की फिर्यादीची मुलगी ही दि. 17 जुलै रोजी रात्री बाथरूमला जाऊन येते, असे आईला सांगून निघून गेली. ती अद्याप घरी परतली नाही. या मुलीला कोणी तरी अज्ञात इसमाने कशाचे तरी आमिष दाखवून फूस लावली व फिर्यादीच्या कायदेशीर रखवालीतून पळवून देत तिचे अपहरण केले. या प्रकरणी अंबड पोलीस ठाण्यात अज्ञात इसमाविरुद्ध अपहरणाचा गुन्हा दाखल करण्यात आला आहे. पुढील तपास पोलीस उपनिरीक्षक कातकाडे करीत आहेत.
अपहरणाचा तिसरा प्रकार सिन्नर फाटा येथे घडला. याबाबत लक्ष्मण मधुकर काकडे (वय 45, रा. चंद्रपूर, ह. मु. सिन्नर फाटा, नाशिक) यांनी फिर्याद दिली आहे. त्यात म्हटले आहे, की त्यांचा मुलगा सोनू काकडे (वय 10) हा दि. 17 जुलै रोजी सकाळी साडेसात वाजता घरात होता व त्याचे आई-वडील कामानिमित्त बाहेर गेले होते. ही संधी साधून अज्ञात इसमाने या मुलाला अज्ञात कारणातून फूस लावून पळवून नेत त्याचे अपहरण केले. या प्रकरणी नाशिकरोड पोलीस ठाण्यात अपहरणाचा गुन्हा दाखल करण्यात आला असून, पुढील तपास सहाय्यक पोलीस निरीक्षक शेळके करीत आहेत.