नाशिक :- ठिबक सिंचनाच्या कामाच्या फाईलची तपासणी करून बिले ऑनलाईन अपलोड करण्यासाठी 2 हजार रुपयांची लाच घेताना मालेगाव येथील कृषी विभागाच्या कृषी पर्यवेक्षकला लाच लुचपत प्रतिबंधक विभागाने अटक केली आहे. सुधाकर विश्वनाथ सोनवणे (वय 54) असे लाच घेणाऱ्या कृषी पर्यवेक्षकाचे नाव आहे.
याबाबत अधिक माहिती अशी की, तक्रारदार व त्यांचे भाऊ यांची नानाजी देशमुख कृषी संजीवनी प्रकल्प (पोकरा स्कीम) अंतर्गत ठिबक सिंचन या बाबीसाठी लाभार्थी म्हणून निवड करण्यात आलेली आहे. या योजनेच्या अटीनुसार तक्रारदार व त्याचा भाऊ यांनी त्यांच्या कुटुंबाच्या शेतजमिनीवर फळबाग लागवड करून ठिबक सिंचनाचे काम केलेलं आहे.
या ठिबक सिंचनाच्या कामाच्या फाईलची तपासणी करून बिले ऑनलाईन अपलोड करण्यासाठी सोनवणेने 17 मार्च रोजी तक्रारदाराकडे प्रत्येक फाईल चे 1000 रुपये असे रुपये 2000 रुपये लाच मागितली. तक्रारदाराने याबाबत लाच लुचपत प्रतिबंधक विभागाकडे तक्रार केली.
खात्री पटल्यानंतर लाच लुचपत प्रतिबंधक विभागाने सापळा रचला असता आज त्याला लाच घेताना रंगेहाथ पकडण्यात आले.
ही कारवाई अधीक्षक शर्मिष्ठा वालावलकर, अपर अधीक्षक नारायण न्याहाळदे, उपअधीक्षक नरेंद्र पवार यांच्या मार्गदर्शनाखाली पोलीस निरीक्षक साधना भोये बेलगावकर, पो. हवा चंद्रशेखर मोरे, सचिन गोसावी, प्रफुल्ल माळी, विलास निकम, संदीप बतिशे, परशुराम जाधव यांच्या पथकाने केली.