मुंबई । भ्रमर वृत्तसेवा : शिवसैनिक संतोष परब (Shivsainik Santosh Parab) यांच्यावरील हल्ला प्रकरणी भाजप आमदार नितेश राणे (BJP MLA Nitesh Rane) यांना सिंधुदुर्ग जिल्ह्यातील कणकवली दिवाणी न्यायालयाने (Kankavali Court) दोन दिवसांची पोलीस कोठडी सुनावली होती. ही पोलीस कोठडी संपल्यानंतर आज पुन्हा नितेश राणे यांना न्यायालयात हजर करण्यात आले. यावेळी दोन्ही पक्षांकडून युक्तीवाद झाला. सरकारी पक्षाने नितेश राणे यांची आणखी 8 दिवस पोलीस कोठडी द्यावी अशी मागणी केली. तसेच दोन्ही बाजुंचा युक्तीवाद संपल्यानंतर न्यायालयाने नितेश राणे यांना १८ फेब्रुवारीपर्यंत न्यायालयीन कोठडी सुनावली आहे.
याअगोदर पोलिसांनी आज न्यायालयाकडे पोलीस कोठडीची मुदत वाढवण्याची मागणी केली होती. मात्र न्यायालयाने ती मागणी फेटाळली असून त्यांना आता न्यायालयीन कोठडी सुनावली आहे. त्यामुळे आता त्यांचा जामिनासाठीचा अर्ज मोकळा झाला असून लगेचच जिल्हा सत्र न्यायालयामध्ये त्यांच्या जामिनासाठीचा अर्ज दाखल करणार असल्याची माहिती नितेश राणे यांचे वकील सतीश मानेशिंदे व संग्राम देसाई यांनी दिली आहे.
दरम्यान शिवसैनिक संतोष परब यांच्यावर गेल्या १८ डिसेंबरला झालेल्या हल्ल्याप्रकरणी प्रमुख संशयित असलेले नितेश राणे गेल्या दोन दिवसांपासून पोलीस कोठडीत होते. आज त्यांना न्यायालयात हजर करण्यात आले असता न्यायालयाने त्यांना न्यायालयीन कोठडी सुनावली आहे.