लासलगाव :- वीज वितरण कर्मचाऱ्यास मारहाण, शिवीगाळ केल्याप्रकरणी निफाड तालुक्यातील रुई येथील उपसरपंच सविता केदारनाथ तासकर व त्यांचे पती केदारनाथ देवराम तासकर यांच्यावर गुन्हा दाखल करण्यात आला आहे.
याबाबत देवगाव येथील सहाय्यक अभियंता दिनेशसिंग राजपूत यांनी फिर्यादीत म्हटले आहे की, रुई ग्रामपंचायतीकडे नळ पाणीपुरवठा योजनेचे तब्बल ५ लाख ३२ हजार ६५० रुपये व २ लाख ५४ हजार २१० रुपये थकीत बिल असल्याने सदर ग्रामपंचायतीला वारंवार कळवूनही ग्रामपंचायत बिल भरत नसल्याने आम्ही आमचे सोबत कर्मचारी धीरज वैभव जोशी, किरण नामदेव पानसरे, समाधान दगू तनपुरे हे काल सायंकाळी ५.३० वाजेच्या सुमारास ग्रामपंचातीच्या सार्वजनिक पाणीपुरवठा विहिर, कोळगाव रोड, कालव्याजवळ, रुई शिवार येथे जाऊन नळ योजनेचे वीज कनेक्शन सहकाऱ्यांमार्फत कट केले.
या ठिकाणी गावातील उपसरपंच सविता केदारनाथ तासकर व त्यांचे पती केदारनाथ देवराम तासकर (दोघे रा. रुई, ता.निफाड) हे राजपुत यांच्याजवळ जात “तुम्ही आमचे गावात येऊन पोलवर चढून वीज कनेक्शन का कट केले?” अशी कुरापत काढून राजपूत व त्यांच्या सहकाऱ्यांना शिवीगाळ व दमदाटी करून तुमचे तंगडे तोडतो असे बोलले. त्यावेळी राजपूत यांनी त्यांना समजावून सांगण्याचा प्रयत्न केला. तुम्ही बिल भरले नाही म्हणून कारवाई केल्याचे राजपूत यांनी त्यांना सांगितले.
त्यानंतर केदारनाथ तासकर वरिष्ठ उप कार्यकारी अभियंता सोनवने यांच्याशी फोनवर संवाद साधला. सोनवणे यांनी राजपूत यांना फोन करत तासकर हे शुक्रवारी पैसे भरणार असून त्यांचे कट केलेले कनेक्शन पुन्हा जोडून द्या असे राजपूत यांना सांगितले. त्यानुसार त्यांनी इतर सहकार्यांसह तोडलेले कनेक्शन पुन्हा जोडून दिले. त्यानंतरही सविता केदारनाथ तासकर यांनी सर्वांना शिवीगाळ, दमदाटी करून धीरज जोशी यांचे मारहाण केली. राजपूत नंतर तेथून निघून जात असताना केदारनाथ तासकर यांनी त्यांची गाड़ी अडवत तुम्ही पुन्हा कसे येता, पोलवर कसे चढता असे बोलून शिवीगाळ व दमदाटी केली.
राजपूत यांच्या फिर्यादीवरून तासकर दाम्पत्याविरुद्ध लासलगाव पोलीस ठाण्यात भा.दं.वि. कलम ३५३, ३४१, ३२३, ५०४, ५०६, ३४ प्रमाणे गुन्हा दाखल केला. याप्रकरणी लासलगावचे सहा.पो.निरीक्षक राहुल वाघ, पो.उपनिरीक्षक आदिनाथ कोठाळे, स.पो.उपनिरीक्षक लहानु धोक्रट, पोलीस नाईक संदीप शिंदे, पोलीस नाईक औदुंबर मुरडनर अधिक तपास करीत आहेत.