नाशिक । भ्रमर वृत्तसेवा : पोलीस असल्याची बतावणी करून वृद्धाजवळील सुमारे 55 हजार रुपये किमतीच्या सोन्याच्या दोन अंगठ्या रुमालात ठेवण्याचा बहाणा करून लांबविल्याची घटना जय भवानी रोड येथे घडली.
याबाबत पोलिसांनी दिलेली अधिक माहिती अशी, की फिर्यादी प्रकाश मारुतीराव काळे (वय 74, रा. प्रथमेश बंगला, जय भवानी रोड नाशिकरोड) हे काल दुपारी 12 वाजता नातीला शाळेतून घरी घेऊन पायी जात होते. ते आडकेनगर येथे आले असता दोन अज्ञात इसम त्यांच्याजवळ आले. “आम्ही क्राईम ब्रँचचे पोलीस आहोत,” असे सांगून त्यातील एका इसमाने प्रकाश काळे यांच्या हातात असलेल्या 30 हजार व 25 हजार रुपये किमतीच्या दोन सोन्याच्या अंगठ्या रुमालात ठेवण्याचा बहाणा केला; मात्र या अंगठ्या त्या इसमाने रुमालात न ठेवता काळे यांची फसवणूक करून पसार झाला.
दरम्यान या प्रकरणी उपनगर पोलीस ठाण्यात दोन अज्ञात इसमांविरुद्ध फसवणुकीचा गुन्हा दाखल करण्यात आला आहे. पुढील तपास पोलीस उपनिरीक्षक लोंढे करीत आहेत.