गेल्या काही महिन्यांपासून तेलुगू चित्रपटसृष्टीतील लोकप्रिय विनोदी अभिनेता फिश वेंकट यांची प्रकृती खालावत होती. किडनी आणि लिव्हर फेल्युअरमुळे त्यांना उपचारांसाठी रुग्णालयात दाखल करण्यात आले होते. काही दिवसांपूर्वीच त्यांना व्हेंटिलेटरवर ठेवण्यात आले होते. अखेर डॉक्टरांचे प्रयत्न अयशस्वी ठरले आणि शुक्रवारी ( दि. १८ जुलै) निधन झाले.

वेंकट यांच्यावर किडनी ट्रान्सप्लांट करण्याची गरज होती. त्यांची मुलगी श्रावंतीने सोशल मीडियावर आर्थिक मदतीचे आवाहन करत ट्रान्सप्लांटसाठी सुमारे ५० लाख रुपयांची गरज असल्याचे सांगितले होते. अभिनेता विष्वक सेन , पवन कल्याण, तेलंगणा सरकारमधील एका मंत्र्याने त्यांना आर्थिक मदत केली होती. मात्र, योग्य किडनी डोनर वेळेवर मिळाला नाही. त्यामुळे त्यांचे निधन झाले. मुख्यतः विनोदी आणि सहाय्यक भूमिका करत त्यांनी आपल्या खास शैलीतून प्रेक्षकांना खळखळून हसवले. त्यांच्या निधनामुळे तेलुगू चित्रपटसृष्टीत शोककळा पसरली आहे.