सध्या राज्यातील राजकरणात मोठ्या घडामोडींना वेग आला असून आता भाजप पक्षात मोयही उलथापालथ बघायला मिळत आहे. नुकतेच तामिळनाडूत अण्णामलाई यांच्या राजीनाम्या नंतर अनेक पदाधिकाऱ्यांनी पक्षाला रामराम ठोकला त्यामुळे भाजपला मोठा हादरा बसला आहे. दरम्यान आता पुन्हा एक मोठी बातमी समोर येत आहे.
सिंधुदुर्ग जिल्ह्यातील सावंतवाडीमध्ये भारतीय जनता पक्षाला मोठा धक्का बसला आहे. भाजपच्या महिला शहराध्यक्ष तथा नगरसेविका मोहिनी मडगावकर यांनी आपल्या पदाचा राजीनामा दिला असून त्यांच्या समर्थनार्थ संपूर्ण शहर कार्यकारिणीनेही तडकाफडकी राजीनामे दिले आहेत. पक्षांतर्गत सुरू असलेल्या दुफळीमुळे हा निर्णय घेण्यात आल्याची चर्चा राजकीय वर्तुळात सुरू झाली आहे.
मोहिनी मडगावकर यांनी प्रतिनिधी विकास गावकऱ यांच्याशी संवाद साधताना आपली भूमिका स्पष्ट केली. त्या म्हणाल्या, यापूर्वीही दोन वेळा त्यांना महिला शहराध्यक्ष पद सोडण्यास सांगण्यात आले होते. त्या नगरसेविका असल्यामुळे हे पद दुसऱ्याला देण्याचा दबाव टाकला जात होता. मात्र त्यांनी सातत्याने पक्षासाठी काम करत विविध उपक्रम यशस्वी केले.
तरीदेखील त्यांना पदावरून हटवण्याचा प्रयत्न सुरू असल्याचे त्यांनी सांगितले. त्यामुळे अखेर स्वतःहून राजीनामा देण्याचा निर्णय घेतल्याचे त्यांनी स्पष्ट केले. पुढेही पक्षासाठी काम करणार असल्याचे सांगत त्यांनी आता या पदावर परत येणार नसल्याचेही स्पष्ट केले आहे.
