मुंबई:  तुम्हाला जर वडापाव, पावभाजी, सँडविच किंव तत्सम पावासोबत मिळणारे पदार्थ खाणे आवडत असेल. तर, जरा खिसा आणखी सैल सौडण्याची तयारी ठेवा. कारण देशभरात मैदा भलताच महाग झाला आहे. मैद्याच्या दरात वाढ झाल्याने सर्वसामान्यांच्या रोजच्या आहारातील ब्रेड महागलाय. सहाजिकच पावाचा वापर केल्या जाणाऱ्या पदार्थांच्या किमतीतही वाढ झाल्याचे पाहायला मिळते. मैद्याच्या दरात वाढ झाल्याने ब्रेडच्या पाकिटामागे 2 ते 8 रुपयांची वाढ करण्यात आलीय. धान्य आणि भाज्या अगोदरच आवाक्याबाहेर गेल्यात. आता ब्रेडदेखील महाग झाल्याने सकाळचा नाश्तादेखील महागला आहे.

व्हाईट स्लाईड ब्रेडच्या किमती 2 ते 8 रुपयांची वाढवण्यात आल्यात. 350-400 ग्रॅम वजनाच्या नेहमीच्या ब्रेडची किंमत आता 35 रुपयांवरून 38 रुपये झालीय. तर 18 रुपयांत मिळणारा 200 ग्रॅमची मिनी ब्रेड 20 रुपयांचा झालाय. व्हाईट ब्रेडच्या किंमतीत वाढ झाली  तरी ब्राऊन ब्रेडच्या किंमतीत कोणतीही वाढ झालेली नाही. काही दिवसांपूर्वी प्रचंड महाग झालेले टोमॅटो, त्यानंतर महागलेल्या भाज्या आणि आता महागलेला ब्रेड यामुळे सँडविच विक्रेत्यांना याची झळ बसतेय. 

दरम्यान सँडविच विक्रेत्यांकडून सांगण्यात येत आहे की, मैद्याच्या किंमतीत वाढ झाल्याने ब्रेड महागला आहे. सध्या  प्लेन व्हेज सॅडविचसाठी 30 रुपये तर व्हेज टोस्टसाठी 40 रुपये दर आहेत. या पेक्षा जास्त दर सध्या वाढवता येणार नाही.  महागाईमुळे गेल्या वर्षी  दरवाढ केली होती. आता पुन्हा आम्हाला दरवाढ करता येणार नाही. प्रत्येक महिन्याला दर वाढ असतात. गेल्या महिन्यात टोमॅटो महागले तर या महिन्यात कांदा महागला आहे. त्यामुळे सतत दरवाढ केली तर धंदा करता येणार नाही.