नवी दिल्ली (भ्रमर वृत्तसेवा) :– देशात पुन्हा एकदा कोरोनाचे रुग्ण वाढण्यास सुरुवात झाली आहे. मात्र, असे असले तरी या विषाणू विरुद्ध लढण्यासाठी जगात अनेक लसी उपलब्ध आहेत, ज्या कोरोनावर प्रभावी आहेत. यात आता आणखी एका लसीची भर पडणार असून, देशाला आणखी एक मिळणार आहे. ही नोझल लस असेल, म्हणजे नाकाद्वारे ती देण्यात येईल.
लस निर्माता भारत बायोटेकचे अध्यक्ष आणि व्यवस्थापकीय संचालक डॉ. कृष्णा एला यांनी शनिवारी सांगितले की, आम्ही नोझल लसीची फेज तीनची चाचणी पूर्ण केली आहे. कंपनी पुढील महिन्यात आपला डेटा ड्रग्ज कंट्रोलर जनरल ऑफ इंडिया कडे सादर करेल.
डॉ. कृष्णा यांनी सांगितले की, आम्ही नुकतीच चाचणी पूर्ण केली आहे, आता त्यातील डेटाचे विश्‍लेषण केले जात आहे. पुढील महिन्यात, आम्ही नियामक एजन्सीला डेटा उपलब्ध करून देऊ. जर सर्व काही ठीक झाले तर आम्हाला परवानगी मिळेल अशी आशा आहे. यानंतर ही नवीन नाकावरील लस बाजारात आणली जाईल. ही जगातील पहिली वैद्यकीयदृष्ट्या सिद्ध झालेली नाकातील कोरोना लस असेल.
व्हिवा टेक्नॉलॉजी 2022 मध्ये सहभागी होण्यासाठी कृष्णा पॅरिसमध्ये होते, जिथे त्यांनी लसीचा दुसरा डोस घेतला आहे त्यांनी आता बूस्टर डोस घेणे आवश्यक आहे यावर भर दिला. ड्रग कंट्रोलर ऑफ इंडियाने या वर्षी जानेवारीमध्ये भारत बायोटेकला अनुनासिक कोरोना लसीवर तिसर्‍या स्टँडअलोन फेज चाचणीसाठी परवानगी दिली आहे.
ते म्हणाले की, लसीचा बूस्टर डोस रोग प्रतिकारशक्ती देतो. मी नेहमी म्हणतो की, बूस्टर डोस हा लसीकरण करणार्‍या प्रत्येकासाठी एक चमत्कारिक डोस आहे. लहान मुलांच्या बाबतीतही पहिला आणि दुसरा डोस रोगप्रतिकारक शक्ती देतो, परंतु तिसरा डोस आणखी प्रभावी आहे आणि प्रतिकारशक्ती प्रदान करतो. तिसरा डोस प्रौढांसाठीही खूप महत्त्वाचा आहे. कोरोना 100 टक्के हद्दपार होऊ शकत नाही. त्यामुळे आपल्याला त्याच्यासोबत जगावे लागेल