पुण्याजवळील मुळशीमध्ये राष्ट्रवादी काँग्रेसचे माजी पदाधिकारी राजेंद्र हगवगणे यांची सून वैष्णवी हगवणे हिने आत्महत्या केल्याने एकच खळबळ उडाली होती. दरम्यान वैष्णवी हगवणे प्रकरणात आता मोठी अपडेट समोर आली आहे. 

समोर आलेल्या माहितीनुसार , वैष्णवी हगवणे प्रकरणात  वैष्णवीचे मामे सासरे पुण्यातील तत्कालीन पोलिस महानिरीक्षक जालिंदर सुपेकर यांची अडचण वाढली आहे.

या प्रकरणात महिला आणि बालकल्याण समितीचा अहवाल समोर आला आहे. हुंड्यासाठीच वैष्णवी हगवण्याचा बळी गेल्याचं या अहवालात म्हटलं आहे. तत्कालीन पोलीस महानिरीक्षक जालिंदर सुपेकर यांच्या चौकशीचे आदेश देण्यात यावेत, अशी देखील शिफारस समितीने केली आहे. पोलिसांच्या तपासात अनेक त्रुटी असल्याचं देखील म्हटलं आहे.

मयुरी हगवणे प्रकरणाची जर दखल घेतली असती तर वैष्णवीची आत्महत्या टाळता आली असती, असं देखील अहवालात म्हटलं आहे. त्याचबरोबर, मयुरी हगवणेची तक्रार न घेणाऱ्या पोलीस अधिकाऱ्यांवर कारवाई करण्याची शिफारस देखील समितीने केली आहे.

महिला व बालकांचे हक्क आणि कल्याण समितीने पुणे येथील वैष्णवी हगवणे मृत्यू प्रकरणाच्या अनुषंगाने राज्यात महिलांवरील अत्याचार तसंच हुंडाबळी प्रकरणाबाबतचा पहिला अहवाल विधानसभेत शुक्रवारी सादर केला. आमदार मोनिका राजळे यांच्या अध्यक्षतेखाली या समितीने न्याय मिळावा, अशी मागणी लावून धरली आहे.