दैनिक भ्रमर - इगतपुरीच्या प्रांत अधिकारीपदी जीवीएस पवनदत्ता यांची नियुक्ती शासनाने केली आहे. त्यांच्या सह अन्य सहा अधिकाऱ्यांच्या बदल्या करण्यात आल्या आहेत.मागील आठवड्यामध्ये शासनाने जिल्हा परिषदेच्या मुख्य कार्यकारी अधिकारी आशिमा मित्तल यांची जालना येथे बदली केल्यानंतर रिक्त झालेल्या जागेवर इगतपुरीचे सहाय्यक जिल्हाधिकारी तथा प्रांत अधिकारी ओंकार पवार यांची नियुक्ती केली होती. त्यामुळे इगतपुरी येथील प्रांत अधिकारी हे पद रिक्त होते. 

शासनाने मंगळवारी राज्यामधील सात अधिकाऱ्यांच्या बदल्या केल्या आहेत. या बदल्यामध्ये आयएएस अधिकारी असलेले जीव्हीएस पवनदत्ता यांची इगतपुरीच्या सहाय्यक जिल्हाधिकारीपदी तथा प्रांत अधिकारी पदी बदली करण्यात आली आहे. याचबरोबर नाशिक महानगरपालिकेचे माजी आयुक्त अशोक करंजकर यांची वैज्ञानिक विकास महामंडळाच्या सदस्य सचिवपदी बदली करण्यात आली आहे, तर नाशिक मधील माजी उपजिल्हाधिकारी संजय कोलते यांची भंडारा येथे जिल्हाधिकारी म्हणून बदली करण्यात आलेली आहे. 

नंदुरबार जिल्हा परिषदेच्या मुख्य कार्यकारी अधिकारी नमन गोयल यांची गडचिरोली येथे प्रकल्प अधिकारी म्हणून बदली करण्यात आली आहे. त्यांच्या जागेवर भंडारा येथून सावंत कुमार यांची नियुक्ती करण्यात आली आहे.