मनोरंजन विश्वातून एक खळबळजनक बातमी समोर आली आहे. सुप्रसिद्ध अभिनेता आणि व्हॉइस-कलाकार टोनी जर्मानो यांचे दुर्दैवी निधन झाले आहे. धक्कादायक म्हणजे ब्राझील येथील साओ पावलो येथील घराच्या छताची दुरुस्ती करत असताना ते तोल जाऊन खाली पडले आणि या अपघातात त्यांचा मृत्यू झाला. वयाच्या ५५ व्या वर्षी त्यांनी अखेरचा श्वास घेतला.
टोनी जर्मानो यांनी अभिनयासोबतच व्हॉइस-आर्टिस्ट म्हणूनही भक्कम ओळख निर्माण केली होती. नेटफ्लिक्स, निकेलोडियन, डिस्ने यांसारख्या आंतरराष्ट्रीय प्लॅटफॉर्मसाठी त्यांनी अनेक लोकप्रिय प्रकल्पांना आवाज दिला. त्यात 'गो डॉग गो!', 'निकी, रिकी, डिकी आणि डॉन' यांसारख्या चर्चित शोचा समावेश आहे.
याशिवाय रंगभूमीवरही त्यांचे अत्यंत यशस्वी करिअर होते.
ही घटना २६ नोव्हेंबर २०२५ रोजी सकाळच्या सुमारास घडली. त्यांच्या मॅनेजरने दिलेल्या निवेदनात म्हटले आहे, “हा अतिशय दु:खद प्रसंग असून, आमच्या प्रिय मित्राच्या निधनाची माहिती देताना आम्हाला अत्यंत वेदना होत आहेत.
त्यांच्या अचानक निधनाने सहकलाकार, दिग्दर्शक आणि चाहत्यांमध्ये शोककळा पसरली आहे. अनेकांनी त्यांना “प्रतिभावान, मनमिळाऊ आणि अविस्मरणीय कलाकार” म्हणून श्रद्धांजली वाहिली आहे.