गेल्या काही दिवसांपासून बंगालच्या उपसागरावर दितवाह चक्रीवादळ घोंघावत आहे. या वादळाने श्रीलंकेत कहर केला आहे. मागील ४८ तासांत दितवाह वादळाने १०० हून अधिक बळी घेतले आहेत. १२३ लोकांचा बळी घेतलेल्या चक्रीवादळाने भारताकडे मोर्चा वळवला आहे.
दितवाह चक्रीवादळ ७ किलोमीटर प्रति तासाच्या वेगाने उत्तरेच्या दिशेने पुढे सरकत आहे. सध्या चक्रीवादळ पुड्डुचेरीहून ३३० किलोमीटर दूर आणि चेन्नईच्या दक्षिणेस ४३० किमी अंतरावर, श्रीलंकेच्या किनाऱ्यावर आणि नैऋत्य बंगालच्या उपसागरावर केंद्रीत आहे.
दितवाह चक्रीवादळाच्या पार्श्वभूमीवर दक्षिण भारतातील ५ राज्यात मुसळधार पावसाचा इशारा देण्यात आला आहे. या वादळाचा सर्वाधिक फटका तामिळनाडू, आंध्र प्रदेशला बसण्याची शक्यता आहे. तर या व्यतिरिक्त केरळ, कर्नाटक, पुड्डूचेरी आणि तेलंगणातही पावसाची शक्यता व्यक्त करण्यात आली आहे.
हवामान विभागाने मुसळधार पावसासह रेड आणि ऑरेंज अलर्ट जारी केला आहे. या वादळामुळे उत्तर भारतात हवेत गारवा निर्माण झाला आहे. उत्तर भारतातील अनेक राज्यात किमान तापमान १० अंश सेल्सिअसपेक्षा कमी झालं आहे.
मीडिया रिपोर्टनुसार, वायव्य भारतात तापमान हे २ ते ४ अंश सेल्सियसने कमी होण्याची शक्यता आहे. मध्य भारतातील मध्य प्रदेश, पूर्व राजस्थान, पश्चिम महाराष्ट्र आणि छत्तीसगडमध्ये थंडीची लाट येत आहे.
