गेल्या काही दिवसांपासून महाराष्ट्रातील एका आत्महत्येने मोठी खळबळ उडाली आहे. डॉक्टर गौरी पालवे गर्जे यांची आत्महत्या राज्यात आणि राज्याच्या राजकारणात चांगलीच चर्चेत आहे. डॉक्टर गौरी पालवे गर्जे यांचे पती अनंत गर्जे हा भारतीय जनता पक्षाच्या नेत्या पंकजा मुंडे यांचा पीए आहे. 

अनंत गर्जेची पत्नी डॉक्टर गौरी पालवे गर्जे यांनी मुबंईतील राहत्या घरात आत्महत्या केली होती. अनंत गर्जे आणि गौरीचे फेब्रुवारी महिन्यात मोठ्या थाटामाटात लग्न झाले होते. घराच्या शिफ्टींगच्या वेळी काही पेपर गौरीला सापडले होते. हे पेपर गर्भपातासंबंधी होते. यात एका महिलेचा उल्लेख होता. ही महिला अनंत गर्जेची जुनी प्रेयसी असल्याचे म्हटले जाते. तसेच तिच्या गर्भपाताच्या पेपरवर नवऱ्याचे नाव अनंत गर्जे असे होते. 

आता या प्रकरणात अनंत गर्जेच्या जुन्या प्रेयसीने जबाब नोंदवला आहे. गौरीच्या आत्महत्येनंतर अनंत गर्जेवर वरळी पोलीस ठाण्यात गुन्हा दाखल करण्यात आला. त्यानंतर आता जुन्या प्रेयसीने वरळी पोलीस ठाण्यात जबाब नोंदवला आहे. २०२२ पासून माझा आणि अनंतचा काहीही सबंध नाही. गौरीला घरी सापडलेल्या कागदपत्रांबद्दल मला काहीही कल्पना नाही असे जुन्या प्रेयसीने म्हटले आहे.

सामाजिक कार्यकर्त्या अंजली दमानिया यांनी या प्रकरणी प्रतिक्रिया दिली होती. “गौरी आधी बीडीडी चाळीत राहायची. तिथून त्यांना टॉवरमध्ये शिफ्ट करायचं होतं, तेव्हा पॅकिंगच्यावेळी तिला काही पेपर्स सापडले. त्यात एका बाईच्या नावाचा उल्लेख होता. तिचा गर्भपात करण्यासाठी हॉस्पिटलमध्ये नेण्यात आलं होतं, त्यावर तिच्या नवऱ्याचं नाव अनंत गर्जे लिहिलेलं होतं. हे पेपर मिळाल्यावर त्यांचे वाद वाढत गेले. त्यातून हे झालं,” असे अंजली दमानिया म्हणाल्या होत्या.