दृश्यम या चित्रपटाच्या पहिल्या आणि दुसऱ्या भागाला प्रेक्षकांची मोठी पसंती मिळाली आहे. बॉक्स ऑफीसवर मोठी कमाई केली. यामध्ये अजय देवगणच्या भूमिकेसोबतच अक्षय खन्नाच्या भूमिकेचेही मोठे कौतुक झाले. आता दृश्यम ३ ची चाहते  वाट पाहत असताना चाहत्यांना मोठा धक्का बसला आहे. कारण आता चित्रपटातून अक्षय खन्ना बाहेर पडला आहे. 

2 ऑक्टोबर 2026 हा पिक्चर रिलीज होणार असल्याची घोषणा करण्यात आली आहे. चित्रपटाच्या घोषणेपासून, त्याच्या कलाकारांबद्दल बऱ्याचा बातम्या समोर आल्या आहेत. मात्र अक्षय खन्नाने हा चित्रपट करण्यास नकार दिल्याने बरीच खळबळ माजली. अखेर आता नव्या कास्टची एंट्री झाली असून चित्रपट आता शूटिंगच्या पुढील टप्प्यात प्रवेश करणार आहे, आणि नवीन कलाकार हे नवं शेड्यूलही जॉईन करणार आहेत.

अक्षय खन्ना सध्या त्याच्या धुरंधर चित्रपटाच्या यशाचा आनंद घेत आहे. सुरुवातीला त्याच्या फीच्या मागणीमुळे तो दृश्यम 3 मधून बाहेर पडत असल्याची बातमी समोर आली. पण,फीच्या मागणीव्यतिरिक्त, त्याच्या इतर अनेक मागण्या होत्या, त्या पूर्ण करण्यात आल्या होत्या असा खुलासा चित्रपटाच्या निर्मात्यांनी केला होता. पण तरीही अक्षय चित्रपटातून बाहेर पडला. आता त्याच्या जागी जयदीप अहलावत हा महत्वाच्या भूमिकेत दिसणार आहे.

चित्रपटाची घोषणा झाल्यापासून प्रेक्षक या चित्रपटासाठी खूप उत्सुक आहेत. चित्रपटाचे चित्रीकरण मुंबईत सुरू होते, पण आता हे शेड्यूल लवकरच संपणार आहे, त्यानंतर संपूर्ण टीम गोव्याला रवाना होईल. चित्रपटातील अनेक महत्त्वाची दृश्यं गोव्यात चित्रित केली जाणार आहेत, ज्यासाठी चित्रपटाचा नवा चेहरा म्हणजेच जयदीप अहलावत देखील उपस्थित राहणार आहे.

रिपोर्ट्सनुसार, फेब्रुवारीच्या अखेरीस गोव्यात चित्रपटाचे शूटिंग पूर्ण होणार आहे. अजय देवगण व्यतिरिक्त, तब्बू, श्रिया सरन आणि रजत कपूर हे देखील चित्रपटाचा महत्वाचा भाग आहेत.