16 मे ते 30 मे च्या दरम्यान आयपीएलचे उरलेले सामने खेळवण्याचा बीसीसीआयचा प्लान आहे. आधीच्या वेळापत्रकानुसार आयपीएलची फायनल 25 मे रोजी होणार होती, पण आता 25 मे रोजीच फायनल खेळवायची असेल तर उरलेले सगळे सामने डबल हेडर म्हणून खेळवावे लागतील. प्रत्येक दिवशी दोन सामने ठेवून 25 मे रोजी ठरलेल्या वेळापत्रकानुसार आयपीएल फायनल खेळवण्याचा पर्यायही बीसीसीआयपुढे उपलब्ध आहे, पण बीसीसीआय 16 मे ते 30 मे पर्यंत आयपीएल खेळवण्याचा विचार करत आहे.

दरम्यान, 30 मे रोजी आयपीएलची फायनल खेळवली जाणार असेल तर मात्र अंतिम सामन्याचं ठिकाण बदललं जाण्याची शक्यता आहे. पीटीआयने दिलेल्या वृत्तानुसार 30 मे रोजी कोलकात्यामध्ये ढगाळ हवामान आणि पावसाचा अंदाज आहे, त्यामुळे आयपीएल फायनल अहमदाबादच्या नरेंद्र मोदी स्टेडियममध्ये खेळवली जाण्याची शक्यता आहे. सुरूवातीच्या वेळापत्रकानुसार आयपीएल 2025 ची फायनल कोलकात्याच्या ईडन गार्डन मैदानावर खेळवली जाणार होती.