उत्तर प्रदेशातील झाशीमध्ये एक धक्कादायक प्रकार समोर आला आहे. कर्जाची रक्कम वसूल करण्यासाठी खासगी बँकेने सर्व मर्यादा ओलांडल्याच येथे दिसून आलं. कर्जाचा हप्ता न भरल्यामुळे, एका खाजगी मायक्रो फायनान्स बँकेने एका महिलेला 5 तास ओलीस ठेवल्याचा आरोप आहे. 

हे प्रकरण बमहरौली गावातील आझाद नगर परिसरातील एका खाजगी गट कर्ज देणाऱ्या बँकेशी संबंधित आहे. येथे, पूंछ येथील बाबाई रोड येथील रहिवासी रवींद्र वर्मा यांच्या पत्नी पूजा यांना सोमवारी जबरदस्तीने बँकेत बसवण्यात आलं,असा आरोप आहे. हप्ता दे आणि बायकोला ने, असं उत्तर महिलेच्या पतीला, रविंद्रला बँकेत पोहोचल्यावर देण्यात आलं. रवींद्रने हताश होऊन पोलिसांना फोन केला. पोलिस येताच बँक कर्मचाऱ्यांचे चेहरे पडले आणि महिलेला घाईघाईने बाहेर काढण्यात आले.

पीडितेने दिलेल्या अर्जात असं सांगितलं की, तिने 40 हजार रुपयांचे कर्ज घेतले आहे. तिने आतापर्यंत 11 हप्ते भरले आहेत. परंतु बँकेच्या नोंदींमध्ये फक्त 8 हप्तेच दिसत आहेत. बँक एजंट कौशल आणि धर्मेंद्र यांनी तिचे तीन हप्ते हडप केल्याचा आरोप आहे. बँक सीओ संजय यादव सोमवारी तिच्या घरी पोहोचले आणि धमकी देऊन पैशाची मागणी करू लागले,असा आरोप महिलेने केला. मात्र त्या महिलेने नकार दिल्यावर पती-पत्नीला जबरदस्तीने बँकेत आणण्यात आले आणि तिथेच अनेक तास बसवून ठेवण्यात आले, असंही महिलेचं म्हणणं आहे.

बँक व्यवस्थापक अनुज कुमार यांनी सांगितले की, ती महिला गेल्या 7 महिन्यांपासून हप्ता भरत नव्हती, म्हणून तिला बोलावण्यात आले. एवढंच नव्हे तर ती महिला स्वतःच्या मर्जीने बँकेत बसली होती. सध्या पोलिसांनी या प्रकरणाचा तपास सुरू केला आहे. बँक कर्मचारी, एजंट आणि पीडित व्यक्तीची चौकशी सुरू आहे.