भारतीय शेअर बाजारात सलग दुसऱ्या दिवशी तेजी पहायला मिळाली. सेन्सेक्सवरील 30 पैकी 15 शेअरमध्ये तेजी पाहायला मिळाली. दिवसभरात तेजी आणि घसरणीचं चित्र कायम असलं तरी सेन्सेक्समध्ये 213 अंकांची उसळी झाली. सेन्सेक्स 213 अंकांच्या तेजीसह 81196 अंकांवर बंद झाला. दुसरीकडे निफ्टी 50 मध्ये देखील 57 अंकांची वाढ झाली आहे. निफ्टी 50 निर्देशांक 24894 वर बंद झाला.

या आठवड्यात सर्वाधिक तेजी मेटलच्या शेअरमध्ये पाहायला मिळाली. निफ्टी मेटल निर्देशांकात 4 टक्क्यांची वाढ झाली. निफ्टी PSU बँक निर्देशांक 2 टक्क्यांनी वाढला. याशिवाय रियल्टी, आयटी, फार्मा आणि एफएमसीजी निर्देशांकात वाढ झाली.

सेन्सेक्स आणि निफ्टी प्रमाणं बीएसई स्मॉलकॅप निर्देशांक 1.09 टक्क्यांच्या तेजीसह बंद झाला. तर, मिडकॅप निर्देशांकात देखील तेजी पाहायला मिळाली. यामुळं गुंतवणूकदारांनी आजच्या दिवसात अडीच लाख कोटींची कमाई केली.

बॉम्बे स्टॉक एक्सचेंजवर लिस्ट असलेल्या कंपन्यांचं बाजारमूल्य 3 ऑक्टोबरला 457.76 लाख कोटींवर पोहोचलं. जे 1 ऑक्टोबरला 454.34 लाख कोटी रुपये होते.म्हणजेच बीएसईवर लिस्ट असलेल्या कंपन्यांचं बाजारमूल्य एका दिवसात 2.42 लाख कोटींनी वाढलं.

सेन्सेक्सवरील 30 पैकी 15 शेअरमध्ये तेजी पाहायला मिळाली. यात टाटा स्टील, पॉवरग्रिड, एक्सिस बँक, कोटक महिंद्रा बँक आणि लार्सन अँड टुब्रोच्या शेअरमध्ये वाढ झाली. तर टेक महिंद्रा, मारुती सूझुकी, अल्ट्राटेक सिमेंट, सन फार्मा, आयसीआयसीआय बँकेच्या शेअरमध्ये घसरण झाली.