नांदेडमध्ये घडलेली आंतरजातीय विवाहाची एक घटना सध्या महाराष्ट्रात चर्चेचा विषय ठरत आहे. आपली मुलगी दलित युवकाशी विवाह करणार आहे असे समजल्यावर त्या तरुणाच्या डोक्यात गोळी मारुन त्याला ठार करण्यात आले व त्याचे फरशीने डोक फोडले. त्याच मृत तरुणाशी प्रेयसी आंचल हिने प्रतिकात्मक लग्न करुन त्याच्याच घरी राहण्याचा निर्णय घेतला. मृत तरुणाचे नाव सक्षम ताटे असे असून त्याची प्रेयसी आंचलने सक्षम प्रेमात जिंकला असल्याची प्रतिक्रिया व्यक्त केली.
मिळालेल्या माहितीनुसार, सक्षम ताटे या तरुणाचे आंचल नावाच्या तरुणीवर प्रेम होते. दोघांनीही लग्न करण्याचे ठरविले. हे प्रेम संबंध कळल्यावर मुलीच्या वडिलांनी आणि भावाने सक्षम ताटे यास मुलीपासून लांब रहा असे सुनावले होते. मात्र, दोघांनी भेटणे आणि बोलणे सोडले नाही. शेवटी सक्षम यास गाठून त्यास गोळी घालून ठार मारण्यात आले.
या घटनेनंतर जेव्हा सक्षम ताटे याच्यावर अंत्यसंस्कार करण्यात आले. त्यावेळी त्याची प्रेयसी आंचल मामीलवाड हिने एक अनपेक्षित कृती केली. ती सक्षमच्या अंत्यसंस्कारासाठी त्याच्या घरी गेली. तेव्हा तिने सक्षमच्या मृतदेहासमोर लग्नाचे काही विधी केले. तसेच तिने सगळ्यांदेखत कपाळावर सक्षमच्या नावाचे कुंकू लावले. हा प्रसंग पाहून उपस्थितांच्या मनात कालवाकालव झाली. सक्षमचा मृतदेह घरी आणताच तिने टाहो फोडला. अंत्यविधीपूर्वी तिने हळद आणि कुंकू लावून घेतलं शिवाय कपाळावर कुंकू भरले. यावेळी सक्षमला देखील हळद लावण्यात आली. हा प्रसंग पाहून उपस्थितांना अश्रू अनावर झाले होते.
या प्रकरणी गजानन मामीडवार, साहिल मामीडवार, सोमेश लाखे, वेदांत कुंदेकर आणि अन्य चौघानी हत्या केल्याच्या आरोपावरुन त्यांना अटक करण्यात आली. एका बाजूला ही कारवाई सुरू असताना अंचलने सक्षम जिंकल्याची प्रतिक्रिया व्यक्त करत त्याच्या नावाचे कुंकू लावणार असून त्याच्याच घरी राहणार असल्याचे जाहीर केले. त्याच्या नावाचे कुंकू लावणे हेच आपले लग्न असल्याचे तिने सांगितले.
या अनुषंगाने पोलीस निरीक्षकास विचारले असता ते म्हणाले, चंद्रसेननगरमधील सक्षम याच्या घरात ही मुलगी सध्या राहत आहे. या मुलीस ताटे यांच्या कुटुंबियांनी स्वीकारले आहे. दरम्यान या प्रकरणातील खूनाच्या आरोपींना पोलिसांनी अटक केल्यानंतर न्यायालयासमोर उभे केले असता त्यांना आठ दिवसाची पोलीस कोठडी मंजूर करण्यात आली आहे.
सक्षम ताटे आणि आंचल यांच्यातील प्रेमाची कहाणी आता ज्याच्या – त्याच्या तोंडी आहे. केवळ जातीबाहेर प्रेम केले म्हणून झालेल्या खूनातील पुरावे पोलीस गोळा करत आहेत. मुलीचे आई-वडील आणि भाऊ सारे आरोपी अटकेत असताना मुलगी मात्र आता प्रियकराच्या घरी मुक्कमी आहे.
