दरम्यान, टेलिग्राम ॲपवर अनेक प्रकारचे आरोप करण्यात आले आहेत. त्याचबरोबर नुकत्याच झालेल्या पेपर लीकमध्येही टेलिग्राम अ‍ॅपचं नाव समोर आलं आहे. टेलिग्रामवर खंडणी आणि जुगार यांसारख्या गुन्हेगारी कृत्यांना प्रोत्साहन दिल्याचा आरोपही करण्यात आला आहे. 

दरम्यान, पेपरफुटीप्रकरणी सरकारला मोठ्या अडचणींचा सामना करावा लागला आहे, कारण विरोधकांनी पेपरफुटीचा मुद्दा बनवून सरकारला कोंडीत पकडण्याचा प्रयत्न केला होता. अशा परिस्थितीत पेपरफुटी प्रकरण आणि टेलिग्रामचं कनेक्शन समोर आलं आहे. त्यामुळे आता केंद्र सरकारनं टेलिग्रामची चौकशी सुरू केली आहे.

फ्रांसच्या पॅरिस एयरपोर्टवरुन टेलिग्रामचे संस्थापक आणि सीईओ पावेल ड्युरोव यांना अटक करण्यात आली आहे. त्यांच्यावर मनी लाँड्रिंग आणि अंमली पदार्थांच्या तस्करीसाठी टेलिग्रामचा वापर केल्याचा आरोप आहे. मीडिया रिपोर्टनुसार, फ्रान्स आणि रशियाचे दुहेरी नागरिकत्व असलेल्या 39 वर्षीय ड्युरोव शनिवारी (24 ऑगस्ट) अझरबायजानहून फ्रान्समध्ये उतरल्यानंतर पॅरिस-ले बोर्जेट विमानतळावर त्यांना ताब्यात घेण्यात आलं. भारतातही इन्स्टंट मेसेजिंग सर्व्हिस- टेलिग्रामचे नाव अनेक गुन्हेगारी प्रकरणांमध्ये समोर आलं आहे.