मुंबईत एका बेस्ट बसचा ट्रकला धडकून अपघात झाल्याची माहिती समोर आली आहे. पश्चिम द्रुतगती मार्गावर आज सकाळी हा भीषण अपघात घडला.
मिळालेल्या माहितीनुसार , बोरिवलीहून अंधेरीच्या दिशेने निघालेल्या बेस्ट बसची ट्रकला जोरदार धडक बसली. ही धडक इतकी जबरदस्त होती की, बसमधील पाच ते सहा प्रवासी गंभीर जखमी झाले असून त्यांच्यावर उपचार सुरू आहेत. हा अपघात गोरेगाव येथील वनराई पोलीस ठाण्याच्या हद्दीत झाला.
नेमकं काय घडलं?
ही बस बोरिवलीहून अंधेरीच्या दिशेने जात होती. गोरेगाव परिसरात वनराई पोलीस स्टेशनच्या हद्दीतून जात असताना बेस्ट चालकाचे बसवरील नियंत्रण सुटले. यावेळी बस प्रचंड वेगात होती. नियंत्रण सुटल्यामुळे बेस्ट बसने एका ट्रकला मागून जोरदार धडक दिली. ही धडक जोरदार असल्यामुळे बसमध्ये असलेले पाच ते सहा प्रवाशी गंभीर जखमी झाले आहेत. त्यांना उपचारासाठी जोगेश्वरीतील हिंदुहृदयसम्राट बाळासाहेब ठाकरे ट्रॉमा केअर रुग्णालयात दाखल करण्यात आले आहे.
या अपघातामध्ये बेस्ट बसचा पुढील एका बाजूचे मोठे नुकसान झाले आहे. तर धडक बसल्यामुळे ट्रकच्या मागच्या बाजूचे नुकसान झाले आहे. ही धडक अत्यंत जोरदार होती. त्यामुळे दोन्ही वाहनांचे काही भाग तुटून रस्त्यावर पडले होते.
सकाळची वेळ असल्यामुळे बेस्ट बसमध्ये तुरळक प्रवासी होते. त्यामुळे मोठा अनर्थ टळला. वनराई पोलीस ठाण्यात बस चालकाविरोधात गुन्हा दाखल करण्याची प्रक्रिया सुरू आहे. पोलिसांनी बेस्ट बसच्या चालकाला ताब्यात घेतले आहे.
