लोकप्रिय मेसेजिंग अ‍ॅप व्हॉट्सअ‍ॅपने मोठी अपडेट आणली आहे. WhatsApp मध्येही आता यूजर नेमचा समावेश होणार आहे. या बदलामुळे लवकरच युजर्स मोबाईल नंबर न देता फक्त युजरनेमच्या आधारे संपर्क साधू शकतील, जसे की टेलिग्राममध्ये आधीपासूनच सुविधा आहे. आता युजरनेम प्रणालीमुळे युजर्सना त्यांच्या प्रोफाईलमध्ये आधी पेक्षा जास्त प्रायव्हसी मिळणार आहे.
युजरनेमसाठी काही नियमदेखील निश्चित करण्यात आले आहेत. वापरकर्त्यांचा युजरनेम www.ने सुरू होता कामा नये, तसेच त्यात किमान एक अक्षर असणं आवश्यक आहे. फक्त अंक किंवा चिन्हे असलेले नाव मान्य होणार नाही. तसेच युजरनेममध्ये केवळ इंग्रजी अक्षरे (a to z), अंक (0–9), डॉट (.) आणि अंडरस्कोर (_) यांचा वापर करता येईल.
२००९ पासून व्हॉट्सअ‍ॅपवर नोंदणी आणि संपर्कासाठी मोबाईल नंबर आवश्यक होता. मात्र अपडेटमुळे युजर्सला मोठा फायदा होणार आहे. या फीचरच्या सध्याच्या बीटा चाचणीत युजर्सना आपल्या पसंतीचे युजरनेम आधीपासूनच रिझर्व्ह करण्याची संधी दिली जाणार आहे. यामुळे लोकप्रिय नावांची नोंदणी योग्य प्रकारे होईल आणि फीचरचा टप्प्याटप्प्याने बदल करताना कंपनीला सिस्टिमची क्षमता तपासता येईल.
सध्या हे फीचर केवळ रिझर्वेशनसाठी उपलब्ध असला तरी, भविष्यात वापरकर्ते आपल्या युजरनेमच्या माध्यमातून थेट चॅट आणि कनेक्शन करू शकतील. व्हॉट्सअ‍ॅपने या फीचरच्या अधिकृत लॉंचची तारीख जाहीर केलेली नाही. मात्र, बीटा आवृत्तीत त्याची उपस्थिती पाहता हा मोठा बदल लवकरच सर्व वापरकर्त्यांसाठी उपलब्ध होण्याची शक्यता आहे.
