महाविकास आघाडीने सध्या निवडणूक आयोगाला चांगलेच धारेवर धरले आहे. राज्यात मतदारयाद्यांमध्ये असणारा घोळ पुराव्यासहित दाखवण्याचे काम महाविकास आघाडीकडून सुरु आहे. दरम्यान, राष्ट्रवादी काँग्रेसचे आमदार रोहित पवार यांनी बनावट मतदार नोंदणी कशी होते, याचा पर्दाफाश केला आहे. 

डोनाल्ड ट्रम्प यांचे बनावट आधार कार्ड ऑनलाइन कसे बनवता येते, हे त्यांनी प्रात्यक्षिक करून दाखवले. बोगस आधार कार्डच्या आधारे मतदार नोंदणी होत असल्याचा आरोप त्यांनी केला. रोहित पवार यांनी भाजपचे पदाधिकारी देवांग दवे यांच्यावरही निवडणूक आयोगाच्या वेबसाइटच्या कामात हस्तक्षेप करून नावे टाकणे आणि डिलीट करण्याचे आरोप केले, जे दवे यांनी फेटाळले आहेत. हे आरोप निवडणूक प्रक्रियेतील गंभीर त्रुटींकडे लक्ष वेधतात.

बुलढाण्यात एक लाख बोगस मतदार असल्याचा खळबळजनक दावा सत्ताधारी शिंदे गटाचे आमदार संजय गायकवाड यांनी केला आहे. या आरोपांमुळे राजकीय वातावरण तापले असून, निवडणूक आयोगाच्या कार्यपद्धतीवर प्रश्नचिन्ह निर्माण झाले आहे.