राज्यसभेतील खासदार आणि ज्येष्ठ नेते कपिल सिब्बल यांनी विरोधी आघाडी इंडियाच्या वृत्तीवर प्रश्नचिन्ह उपस्थित केले. विरोधकांच्या आघाडीची एक औपचारिक रचना असायला हवी ज्यामध्ये विरोधकांच्या आघाडीची अधिकृत भूमिका मांडायला अधिकृत प्रवक्ते असायला हवेत. इंडिया आघाडीने आघाडीसारखे दिसले पाहिजे,  त्यात बिघाडी दिसता कामा नये, असं मत  कपिल सिब्बल यांनी व्यक्त केलं आहे.

भाजपकडे बहुमत नाही. त्यामुळे याबाबत सत्ताधारी राष्ट्रीय लोकशाही आघाडीतील (एनडीए) घटक पक्षांचं म्हणणं काय आहे हे पाहावं लागणार आहे. बिहारमध्ये आता विधानसभा निवड होऊ घातली आहे. त्यामुळे वक्फ विधेयकाचा बिहारच्या निवडणुकीवर काय परिणाम होईल असा त्यांच्यासमोर प्रश्‍न असणार आहे. त्यामुळे या विधेयकाची नेमकी वाटचाल कशी असेल हे मला आताच सांगता येणार नाही असं सांगत सिब्बल यांनी वक्फ बोर्डावरही भाष्य केलं आहे.

मतदारसंघ फेररचनेबद्दल बोलताना सिब्बल म्हणाले, याचा देशाच्या राजकारणावर गंभीर परिणाम होणार आहे. त्यामुळेच त्यावर चर्चा करण्यासाठी स्टॅलिन यांनी याबाबत बैठक घेतली होती आणि काँग्रेससह अनेक पक्षांचे प्रतिनिधी त्याला उपस्थित होते. पण मतदारसंघ फेररचना करण्याआधी जनगणना करणे आवश्यक आहे. जोपर्यंत जनगणना होत नाही तोवर मतदारसंघ फेररचना होणार नाही. ‘अभी दिल्ली दूर है,’ असे म्हणत त्यांनी फेररचनेला अद्याप पुरेसा अवकाश असल्यांचं म्हटलं.