देशभरातील वाहनधारकांना मोठा धक्का बसणारी बातमी आहे. केंद्र सरकारने वाहनांच्या फिटनेस टेस्टची फी १० पट वाढवली आहे. रस्ते परिवहन आणि महामार्ग मंत्रालयाने (MoRTH) वाहनांच्या फिटनेस टेस्टच्या शुल्कात मोठा बदल केला असून काही वाहनांसाठी ही फी पूर्वीच्या तुलनेत तब्बल १० पट वाढली आहे. 

वाहनमालकांना आता फिटनेस टेस्ट संदर्भात मोठा आर्थिक धक्का बसणार आहे. रस्ते वाहतूक आणि महामार्ग मंत्रालय (MoRTH) यांनी जुन्या वाहनांच्या फिटनेस टेस्ट फीमध्ये मोठे बदल केले आहेत. हे नवीन दर सेंट्रल मोटर व्हेईकल रूल्स (फिफ्थ अमेंडमेंट) अंतर्गत लागू करण्यात आले असून ते लगेचच लागू झाले आहेत.नवीन नियमांनुसार, १० वर्षांपेक्षा जुन्या वाहनांवर जास्त शुल्क लागेल आणि शुल्क हे वाहनाच्या वयानुसार ठरवले जाईल. 

नवीन व्यवस्थेनुसार गाड्यांना तीन गटांमध्ये विभागण्यात आले आहे: यानुसार 10 ते 15 वर्ष, 15 ते 20 वर्ष आणि 20 वर्षांपेक्षा जास्त अशी विभागणी करण्यात आली आहे. गाडीचे वय वाढेल तसा फिटनेस टेस्टचा खर्चही वाढत जाईल. हे नवे शुल्क दोन चाकी, तीन चाकी, LMV, मीडियम आणि हेवी व्यावसायिक वाहनांसह सर्व वाहनांवर लागू आहेत. याचा सर्वाधिक फटका कमर्शियल वाहने वापरणाऱ्यांना बसणार आहे.

20 वर्ष जुने ट्रक/बस : 2,500 - 25,000 रुपये

20 वर्ष जुने मीडियम कमर्शियल वाहन : 1,800 - 20,000 रुपये

20 वर्ष जुने LMV : 15,000 रुपये

20 वर्ष जुनी ऑटोरिक्षा : 7,000 रुपये

20 वर्ष जुनी मोटरसायकल : 600 - 2,000 रुपये

15 वर्षांखालील गाड्यांचीही फी वाढली

मोटरसायकल: 400 रुपये

लाइट मोटर वाहन (LMV): 600 रुपये

मीडियम/हेवी कमर्शियल वाहन: 1,000 रुपये

ही फीही आधीपेक्षा जास्त आहे.