हिंगोली शहरात मंगळवारी बाजार परिसरातील मतदान केंद्र क्रमांक ३ येथे सकाळी संतोष बांगर यांच्या व्हायरल झालेल्या व्हिडीओने टीकेचे धनी ठरत होते. संतोष बांगर यांनी महिला मतदाराला ईव्हीएमवर बटन दाबण्याबाबत सांगितले. तसेच “एकनाथ शिंदे आगे बढ़ो हम तुम्हारे साथ हैं” अशी घोषणाबाजी केली. यावेळी मोबाइल फोनचा देखील वापर त्यांनी केला. या घटनेचा व्हिडीओ सोशल मीडियावर चांगलाच व्हायरल झाला.
व्हिडिओ व्हायरल झाल्यानंतर निवडणूक निर्णय अधिकाऱ्यांनी या प्रकरणात चौकशी करण्याचे निर्देश दिले होते. मतदानाच्या गोपनीयतेचा भंग झाल्याचे आढळल्यास संतोष बांगर यांच्यावर गुन्हा दाखल केला जाईल, याबाबत अहवाल मागवण्यात आल्याची माहिती निवडणूक अधिकाऱ्यांनी दिली होती. आता या प्रकरणात आमदार संतोष बांगरांना मोठा झटका बसलाय. संतोष बांगर यांच्यावर हिंगोली शहर पोलीस ठाण्यात गुन्हा दाखल करण्यात आलेला आहे.
मतदान केंद्रात घोषणाबाजी करणे, फोन वापरणे किंवा मतदाराला मतदानाविषयी निर्देश देणे हे सर्वच कृती गोपनीयतेचा भंग आणि आचारसंहितेचा गंभीर उल्लंघन मानले जाते. त्यामुळे संतोष बांगर यांच्यावर कारवाईची मागणी जोर धरत होती. त्यानुसार आता ही कारवाई करण्यात आली आहे.
“किमान लोकप्रतिनिधींनी लोकशाहीची चाड ठेवली पाहिजे. निवडणुकीत आपण कसं वागतोय, आपण कोणता संदेश देतोय याचा विचार केला पाहिजे, ” असे म्हणत देवेंद्र फडणवीस यांनी संतोष बांगर यांना कठोर शब्दांत फटकारले.
