मराठा आरक्षण आंदोलनाचे नेते मनोज जरांगे पाटील यांच्यावरुन दोन गटात वाद झाल्याचं वृत्त आहे. हिंगोलीच्या वसमत तालुक्यातील भेंडेगावात ही घटना घडली आहे. मनोज जरांगे पाटील यांच्याबद्दल आक्षेपार्ह पोस्ट केल्याच्या वादातून दोन गटात बाचाबाची झाली. या प्रकरणी करुंदा पोलीस ठाण्यात तीन जणांविरुद्ध गुन्हा दाखल झाला आहे.
मनोज जरांगे पाटील यांच्याबद्दल आक्षेपार्ह व्हिडिओ बनवून सोशल मीडियावर व्हायरल करण्यात आला. या बद्दल जाब विचारण्यासाठी जरांगे समर्थ भेंडेगावात गेले होते. हा जाब विचारण्यावरून दोन गटांमध्ये चांगलीच बाचाबाची झाली होती. यामुळे भेंडेगावमध्ये काही काळ तणाव निर्माण झाला होता. कुरुंदा पोलिसांना याबाबत मिळताच कुरुंदा पोलिसांनी जमावाला फैलवत गावात शांतता प्रस्थापित केली. त्यानंतर मनोज जरांगे यांचे समर्थक पोलीस ठाण्यामध्ये मोठ्या संख्येने दाखल झाले होते.
पोलिसांनी कोणती माहिती दिली?
भांडेगाव गावामध्ये मोठ्या प्रमाणात लोक जमले आहेत ही माहिती मिळाल्यानंतर घटनास्थळी जाऊन घटनेची माहिती घेतली. काल जो ओबीसीचा कळमनुरीमध्ये मोर्चा होता. त्यामध्ये एका इसमाने मनोज जरांगे पाटील यांच्याबद्दल अपशब्द वापरून तो व्हिडीओ सोशल मीडियावर व्हायरल केला होता.त्यामुळे महागाव आंबा आणि इतर काही गावातील तरुण व्हायरल व्हिडीओ प्रकरणी भेंडेगाव या गावांमध्ये जाब विचारण्यासाठी गेले होते. दोन समाजात तेढ निर्माण केल्या प्रकरणी एक तक्रार आलेली आहे, त्याप्रकरणी कारवाई केली जात आहे.
आता गावामध्ये शांतता आहे. भेंडेगाव मधील दोन्ही समाजातील नेते आणि प्रतिष्ठित नागरिकांना अप्पर पोलीस अधीक्षक आणि पोलीस अधीक्षक यांनी वाद होऊ नये याबाबत सूचना केल्या आहेत. भेंडेगावात आणि पोलीस ठाणे परिसरामध्ये आता शांतता आहे. कोणत्याही अफवावर विश्वास ठेवू नये, कायदेशीर प्रक्रिया पोलीस करत आहेत, असं आवाहन रामदास निरदोडे यांनी केलं.
