माजरी येथील दुर्गा मंदिरात नवरात्रीनिमित्त आयोजित महाप्रसादातून सुमारे २५० भाविकांना विषबाधा झाली. यातील एकाचा उपचारादरम्यान मृत्यू, तर इतर भाविकांवर वरोरा आणि चंद्रपूरच्या रुग्णालयांत उपचार सुरू आहेत. वरोऱ्यापासून सुमारे २२ किलोमीटर अंतरावर माजरीचे दुर्गा मंदिर आहे. सध्या नवरात्र उत्सव सुरू असल्याने शनिवारी महाप्रसाद आयोजित करण्यात आला. गावातील भाविकांनी या महाप्रसादाचा लाभ घेतला. काही वेळानंतर भाविकांना उलट्यांचा त्रास सुरू झाला. त्यांना तातडीने माजरीतील वेकोलीच्या रुग्णालयात नेण्यात आले. या रुग्णालयात मोजक्या खाटा असल्याने तातडीने वरोरा उपजिल्हा रुग्णालयात दाखल केले. सहा जणांची प्रकृती गंभीर झाल्याने त्यांना चंद्रपूर जिल्हा सामान्य रुग्णालयात हलविण्यात आले.
यातील गुरुफेन यादव (८०) यांचा उपचारादरम्यान मृत्यू झाला. उपचारानंतर २४ भाविकांना रुग्णालयातून घरी सोडण्यात आले, अशी माहिती वैद्यकीय सूत्रांनी दिली. वरोरा येथील उपजिल्हा रुग्णालयाला जिल्हा शल्यचिकित्सक डॉ. महादेव चिंचोळे, जिल्हा आरोग्य अधिकारी डॉ. अशोक कटारे, तालुका आरोग्य अधिकारी डॉ. प्रतीक बोरकर यांनी रविवारी सकाळी भेट देऊन परिस्थितीची पाहणी केली. सध्या उपजिल्हा रुग्णालयातील रुग्णांची प्रकृती स्थिर आहे, अशी माहिती डॉ. आकाश चिवंडे यांनी दिली. दरम्यान, या घटनेची गंभीर दखल घेत आयोजक बुल्लुराम दर्शनराम व आचारी छाया तिखट यांच्यावर गुन्हा दाखल करण्यात आला आहे. अधिक तपास माजरी पोलिस ठाण्याचे ठाणेदार सारंग मिराशी करत आहेत.
विषबाधा बुंदीतून?
महाप्रसादामध्ये वरण-भात, भाजी, पोळी व बुंदी या पदार्थांचा समावेश होता. महाप्रसादातील केवळ बुंदी खाणाऱ्यांना त्रास जाणवला. त्यामुळे ही विषबाधा बुंदीतूनच झाली असावी, असा अंदाज व्यक्त केला जात आहे. पाणी व अन्नाचे नमुने तपासणीसाठी अन्न व औषध प्रशासनाने घेतले आहेत.
