मुंबई : दिग्गज उद्योगपती रतन नवल टाटा यांच्या निधनानंतर देशातील सर्वात मोठ्या औद्योगिक घराण्यांपैकी टाटा समूहात अनेक लक्षवेधी बदल पाहायला मिळाले आहेत. नोएल टाटांची टाटा ट्रस्टच्या अध्यक्षपदी निवड करण्यात आली तर टाटा सन्सच्या संचालक मंडळातही त्यांना स्थान देण्यात आले.
त्याचवेळी, आता टाटा परिवाराची नवीन पिढी आणखी एक पाऊल पुढे आली आहे. टाटा ट्रस्टचे अध्यक्ष नोएल टाटा यांच्या मुली - माया आणि लीआ - यांची सर रतन टाटा इंडस्ट्रियल इन्स्टिट्यूटच्या विश्वस्त मंडळावर नियुक्ती करण्यात आली आहे.
टाटा समूहाच्या नव्या पिढीची उद्योगात सरशी
टाटा ट्रस्टचे अध्यक्ष नोएल टाटा यांच्या मुली - माया आणि लीया - यांचा सर रतन टाटा इंडस्ट्रियल इन्स्टिट्यूटच्या विश्वस्त मंडळात समावेश करण्यात आला आहे. SRTII हे सर रतन टाटा ट्रस्टचा एक उपसंच आहे, जो समूहाची होल्डिंग कंपनी टाटा सन्सच्या दोन प्रमुख भागधारकांपैकी एक आहे.
अरनाज कोतवाल आणि फ्रेडी तलाटी यांच्या जागी माया आणि लीआ टाटा यांची नियुक्ती करण्यात आली आहे. दोघांनीही SRTII च्या विश्वस्त मंडळाचा राजीनामा दिला आणि यासह, नोएल टाटांची मुले सर्व लहान टाटा ट्रस्टच्या संचालक मंडळात सामील झाली असून त्यांना अद्याप दोन मुख्य ट्रस्ट - सर रतन टाटा ट्रस्ट अँड अलाइड ट्रस्ट आणि सर दोराबजी टाटा ट्रस्ट अँड अलाइड ट्रस्ट - मध्ये समाविष्ट केले गेले नाही.
दरम्यान नोएल टाटा यांना - लीआ (३९), माया (३६) आणि नेव्हिल (३२) ही तीन मुले आहेत. दिवंगत रतन टाटा यांचे सावत्र भाऊ नोएल टाटा यांची ऑक्टोबर २०२४ मध्ये टाटा ट्रस्टचे अध्यक्ष म्हणून नियुक्ती झाली होती तर, माया आणि लीआ टाटा यांच्या नियुक्तीमुळे अरनाझ कोतवाल यांच्यात अंतर्गत मतभेद निर्माण झाले आहेत.
अरनाझ कोतवाल यांनी सहकारी विश्वस्तांना पत्र लिहून नवीन विश्वस्तांच्या नियुक्तीला परवानगी देण्यासाठी त्यांना राजीनामा देण्यास सांगितले गेले याबद्दल तक्रार केली होती.
टाटा ट्रस्ट्सचे कार्यकारी बुर्जिस तारापोरवाला यांना लिहिलेल्या ई-मेलमध्ये कोतवाल यांनी नोएल टाटांच्या विनंतीवरून राजीनामा दिल्याचा दावा केला. तसेच त्यांनी असेही सांगितले की त्यांना सर दोराबजी टाटा ट्रस्ट आणि सर रतन टाटा ट्रस्टचे विश्वस्त मेहली मिस्त्री यांचा याच मुद्द्यावर फोन आला होता. मेहली मिस्त्री टाटा ग्रुपचे माजी अध्यक्ष दिवंगत सायरस मिस्त्री यांचे चुलत भाऊ आहेत.
