दैनिक भ्रमर : धुळ्यातून एक मोठी बातमी समोर येत आहे. येथे सुरु असलेल्या मोर्चाला हिंसक वळण आले आहे. मोर्चादरम्यान एका पोलीस अधिकाऱ्यावर धारदार शस्त्राने वार करण्यात आला आहे.
नेमकं प्रकरण काय ?
धुळ्यात स्वातंत्र्यदिनी एका २८ वर्षीय नराधमाने ८ वर्षीय चिमुकलीवर अत्याचार केल्याची धक्कदायक घटना समोर आली होती. या घटनेच्या निषेधार्थ हजारोंच्या संख्येने आदिवासी समाज संघटनांनी एकत्र येत शिरपूर तहसील कार्यालयावर निषेध मोर्चा काढला. हाताला काळ्या फिती बांधून निषेधाचे फलक हातात घेत हा निषेध मोर्चा काढण्यात आला. आता याच मोर्चाला हिंसक वळण आले आहे. मोर्चामध्ये सहभागी झालेल्या संतप्त मोर्चेकरांना पांगवण्यासाठी पोलिसांनी लाठीचार्ज केला होता.
लाठीचारादरम्यान पोलीस अधिकारी जयपाल हिरे यांच्यावर धारदार शस्त्राने वार करण्यात आल्याची माहिती समोर आली आहे. झालेल्या हल्ल्यामुळे जयपाल हिरे गंभीररित्या जखमी झाले असल्याचे म्हटले जात आहे. याच दरम्यान काही पोलीस कर्मचारी देखील जखमी झाले आहेत. या निषेध मोर्चाला शिरपूरचे आमदार काशीराम पावरा सहभागी झाल्याचे पाहायला मिळाले. चिमुरडीवर अत्याचार करणाऱ्या नराधमावर कठोरात कठोर शासन करण्यात यावे. त्याचसोबत हा खटला फास्टट्रॅक कोर्टामध्ये चालवण्यात यावा अशी मागणी आंदोलकांतर्फे करण्यात आली आहे.
