दैनिक भ्रमर : १० हजार रुपयांची लाज घेताना महिला शिक्षण विस्तार अधिकाऱ्याला लाचलुचपत प्रतिबंधक विभागाच्या पथकाने अटक केली आहे. रोहिणी दत्तात्रेय नांद्रे (वय 43) असे लाज घेणाऱ्या धुळ्यातील पंचायत समितीच्या शिक्षण विस्तार अधिकाऱ्याचे नाव आहे.
याबाबत अधिक माहिती अशी की, तक्रारदार हे जिल्हा परिषद प्राथमिक शाळा चांदे, ता.जि. धुळे येथे प्रभारी मुख्याध्यापक या पदावर कार्यरत आहेत. ७ ऑगस्ट २०२५ रोजी आरोपी रोहिणी नांद्रे यांनी या शाळेस भेट दिली. त्यावेळी विद्यार्थ्यांची पट संख्या कमी असल्याने तक्रारदार यांचा वरिष्ठांना प्रतिकुल अहवाल सादर न करण्याच्या मोबदल्यात व शाळेस समग्र शिक्षा योजने अंतर्गत मिळालेल्या अनुदानाच्या मोबदल्यात स्वतः करीता व शिक्षण अधिकारी प्राथमिक श्रीमती कुवर यांचेकरीता १०,००० रुपये लाचेची मागणी केली. तक्रारदार यांनी तक्रार याबाबत धुळ्याच्या लाचलूचपत प्रतिबंधक विभागाकडे दिली होती.
या तक्रारीची ११ ऑगस्ट २०२५ रोजी पडताळणी केली असता नांद्रे यांनी स्वतःकरीता व शिक्षण अधिकारी श्रीमती कुवर यांचेकरीता १०,००० रुपये लाचेची मागणी करुन स्विकारण्याचे मान्य केले होते. त्यानंतर आज रोजी सापळा रचला असता सापळा कारवाई दरम्यान नांद्रे यांनी पंचायत समिती, धुळे कार्यालयातील त्यांच्या कक्षात ही लाचेची रक्कम तक्रारदार यांचेकडुन स्वतः स्विकारली असता त्यांना रंगेहाथ पकडण्यात आले. त्यांच्या विरुध्द गुन्हा दाखल करण्याचे काम सुरु आहे.
