लोकसभेसाठी वंचित बहुजन आघाडीने आज पाच उमेदवारांच्या नावाची घोषणा केली. यामध्ये पुणे लोकसभा मतदारसंघातून वसंत मोरे यांना वंचितकडून उमेदवारी देण्यात आली आहे.
काही दिवसांपूर्वी वसंत मोरे यांनी वंचित बहुजन आघाडीचे अध्यक्ष प्रकाश आंबेडकर यांची भेट घेत उमेदवारी संदर्भात चर्चा केली होती. यानंतर अखेर वसंत मोरे यांना वंचितकडून उमेदवारी जाहीर झाली आहे. यासंदर्भातील माहिती वंचित बहुजन आघाडीने ट्विटरवरून दिली आहे.
पुणे लोकसभा मतदारसंघात काँग्रेसकडून रवींद्र धंगेकर तसेच भाजपाकडून मुरलीधर मोहोळ निवडणुकीच्या मैदानात आहेत. आता वंचित बहुजन आघाडीकडून वसंत मोरे यांना उमेदवारी जाहीर झाल्यामुळे पुण्यात तिरंगी लढत होणार आहे.
वसंत मोरे यांनी काही दिवसांपूर्वी मराठा नेते मनोज जरांगे पाटील तसेच खासदार शरद पवार यांचीही भेट घेतली होती. त्याचबरोबर नांदेड मधून अविनाश भोसीकर, परभणी मधून बाबासाहेब उगले, संभाजीनगर मधून अफसर खान व शिरूर मधून मंगलदास बांदल यांना वंचितने उमेदवारी दिली आहे.
