बीड जिल्ह्यातील संतोष देशमुख हत्या प्रकरणाने संपूर्ण महाराष्ट्र हादरला होता. दरम्यान आता याच प्रकरणात एक मोठी अपडेट समोर आली आहे.
या प्रकरणातील साक्षीदार दादा खिंडकर यांना त्यांच्या सख्ख्या लहान भावाकडूनच जीवे मारण्याची धमकी देण्यात आल्याचा आरोप आहे.
मिळालेल्या माहितीनुसार, मृत सरपंच संतोष देशमुख यांचे भाऊ धनंजय देशमुख यांचे साडू दादा खिंडकर हे या प्रकरणातील कायदेशीर प्रक्रियेत सक्रिय भूमिका बजावत आहेत. काही दिवसांपूर्वी दादा खिंडकर हे त्यांच्या घरी असताना त्यांचा लहान भाऊ समाधान खिंडकर तेथे आला होता.
यावेळी जुन्या वादाचा मुद्दा काढत समाधान खिंडकर यांनी दादा खिंडकर यांना संतोष देशमुख प्रकरणात साक्ष देऊ नये, तसेच धनंजय देशमुख यांच्यासोबत राहू नये, असे सांगितल्याचा आरोप करण्यात आला आहे. प्रकरण मिटवून घेण्यासाठी दबाव टाकण्यात आल्याचाही दावा करण्यात आला आहे. याप्रकरणी बीडच्या शिवाजीनगर पोलीस ठाण्यात गुन्हा दाखल करण्यात आला असून पोलीस अधिक तपास करत आहेत.
