आजकाल गुन्हेगारीच्या प्रमाणात वाढ झाली असून बीड जिल्हयात तर गुन्हेगारीने चांगलेच डोके वर काढले आहे. सरपंच संतोष देशमुख यांच्या हत्याप्रकरणानंतर बीड अंधन अनेक घटना उघडकीस आल्या आहेत. दरम्यान आता एक मुलानेच आपल्या जमीनदात्या आईची निघृणपणे हत्या केली असल्याची धक्कादायक घटना समोर आली आहे.
बीड जिल्ह्यातील, अंबाजोगाई तालुक्यातील येल्डा येथे गुरुवारी ही घटना घडली. घरगुती वादातून एका पोटच्या मुलाने आपल्या वयोवृद्ध आईची निर्दयपणे हत्या केल्याची माहिती समोर आली आहे. चोत्राबाई भानुदास सोन्नर असं दुर्दैवी मृत महिलेचं नाव आहे. वयाची साठी क्रॉस केलेल्या आईची स्वत:च्या मुलाने हत्या केली.
पोलिसांनी दिलेल्या माहितीनुसार, आरोपी मुलाची पत्नी काही दिवसांपूर्वी माहेरी गेली होती. त्यानंतर त्याचे घरी आईसोबत किरकोळ कारणांवरून वारंवार खटके उडत होते. याच पार्श्वभूमीवर गुरुवारी दोघांमध्ये मोठं भांडण झाले आणि रागाच्या भरात मुलाने आईवर जीवघेणा हल्ला केला, ज्यात आईचा मृत्यू झाला.
या घटनेची माहिती मिळताच पोलिसांनी तातडीने घटनास्थळी धाव घेतली आणि आरोपी मुलाला ताब्यात घेतलं आहे. पोलिसांनी प्राथमिक तपासात सांगितलं की, घरगुती कलहातून ही हत्या झाली असावी. मात्र, यामागील नेमकं कारण आणि अधिक तपशील पोलीस तपासाअंती समोर येईल. या घटनेमुळे संपूर्ण येल्डा गावात आणि परिसरात शोककळा पसरली असून, एका वयोवृद्ध आईची तिच्याच मुलाने केलेली हत्या सर्वांना सुन्न करून गेली आहे.
