सध्या राज्याच्या राजकारणातील वातावरण तापले असून अनेक घडामोडींना वेग आला आहे. दरम्यान आता ओबीसी नेते लक्ष्मण हाके यांच्या संदर्भात एक बातमी समोर येत आहे.
ओबीसी नेते लक्ष्मण हाके यांचा एक व्हिडिओ सोशल मीडियावर व्हायरल झाला आहे. यात ते एका बड्या नेत्यावर टीका करताना पहायला मिळत आहेत. या नेत्यावर हाके यांनी गंभीर आरोप केले आहेत. हा व्हिडिओ समोर आल्यानंतर आता वेगवेगळ्या चर्चांना उधाण आलं आहे. या व्हिडिओमध्ये हाके यांनी नेमकं काय म्हटलं? तसेच व्हिडिओ व्हायरल झाल्यानंतर हाकेची पहिली प्रतिक्रियाही समोर आली आहे. याबाबत सविस्तर माहिती जाणून घेऊयात.
सोशल मीडियावर व्हायरल झालेल्या व्हिडिओमध्ये लक्ष्मण हाके म्हणत आहेत की, त्याची आपल्यामागे फरपट होत आहे. त्याचं कसं आहे त्यांच्याकडे आहे यंत्रणा, त्याच्याकडे आहे संघटन. मीडिया हँडल करण, मोठा स्टेज डेकोरम देणं, मीडियाला प्रॉपर बातमी देणं. ते म्हणाले आंदोलन करायचं नाही, मी दुसऱ्या दिवशी जाहीर केलं, महाराष्ट्रातल्या लोकांनी जीआर फाडावा, होळी करावी, रस्त्यावर उतराव, निवेदनं द्यावी. बोलला होता ना काय करायचं नाही म्हणून. माझ्या उपस्थितीत म्हणला होता की आंदोलन थांबवा, स्टेजवरच होतो ना मी पण.’
पुढे बोलताना हाके म्हणाले की, ‘हा मुख्यमंत्र्यांना दोन उपमुख्यमंत्र्यांना भेटायला गेलाय. घेऊन कोणाला गेलाय, स्वत:, स्वत:चा मुलगा, स्वत:चा पुतण्या. हे तिघेजण गेले आणि सभेत सांगत आहे की, ते तिघेजण होते आणि आम्ही तिघेजण होतो. मला लय ते वाक्य खटकलं होतं, पण जाऊदे म्हटलं. आपल्याला सॉफ्ट कॉर्नर फक्त.’ मात्र हाके यांचा रोख नेमका कुणाकडे हे समजू शकले नाही
हाके यांचा व्हिडिओ व्हायरल झाल्यानंतर एका वृत्तवाहिनीने हाके यांच्याशी संपर्क साधला. यावेळी बोलताना हाके म्हणाले की, कोणता व्हिडिओ आहे, कधीचा व्हिडिओ आहे, तो पूर्ण का दाखवला जात नाही? मी ओबीसींच्या प्रश्नावर भांडत आहे, लढत आहे, रांत्रदिवस पळत आहे. त्यावर कोणी बोलत नाही. अशा गोष्टींमधून काय साध्य करायचं आहे? ओबीसींच्या प्रश्नावर कोणीही बोलायला तयार नाही. या लोकांचा उद्देश लक्ष्मण हाकेला डॅमेज करणं हा आहे. पण हाके डॅमेज होणाऱ्यातला नाही. मी बोलायचं थांबणार नाही.’ मात्र हाके यांनी डॅमेज करण्याचा प्रयत्न कोण करत आहे त्या नेत्याचे नाव मात्र घेतले नाही.
