भ्रष्टाचाराची पोलखोल करणाऱ्या पत्रकाराचा संशयास्पद मृत्यू झालाय. अतिशय धडाडीनं पत्रकारिता करणाऱ्या, लोकांचे प्रश्न लावू धरणाऱ्या राजीव प्रताप सिंह यांच्या मृत्यूनंतर सर्वच स्तरातून हळहळ व्यक्त केली जात आहे. 'दिल्ली-उत्तराखंड लाईव्ह' नावानं ते डिजिटल प्लॅटफॉर्म चालवत होते. या माध्यमातून ते उत्तरकाशीतील स्थानिक मुद्दे, समस्या यांना राजीव प्रताप सिंह यांच्या वार्तांकनात महत्त्वाचं स्थान होतं. त्यामुळे स्थानिक पातळीवर राजीव यांची वेगळी ओळख निर्माण झाली.
मागील १० दिवसांपासून राजीव प्रताप सिंह बेपत्ता होते. स्वतंत्र पत्रकारिता करणाऱ्या राजीव प्रताप सिंह यांच्या मृत्यूबद्दल संशय व्यक्त केला जात आहे. उत्तराखंडचे मुख्यमंत्री पुष्कर सिंह धामी यांनी राजीव प्रताप सिंह यांच्या मृत्यूबद्दल शोक व्यक्त करत चौकशीचे आदेश दिले आहेत. राजीव प्रताप सिंह बेपत्ता झाल्यापासून त्यांचे कुटुंबिय चिंतेत होते. सोमवारी त्यांचा मृतदेह सापडला.
राजीव यांनी काही दिवसांपूर्वीच उत्तरकाशी जिल्हा रुग्णालयाच्या दुरावस्थेची सविस्तर माहिती देणारा एक व्हिडीओ तयार केला होता, अशी माहिती त्यांच्या पत्नीनं दिली. 'जिल्हा रुग्णालयातील परिस्थिती गंभीर होती. रुग्णालयाच्या भिंतींना तडे गेले होते. औषधांचा तुटवडा होता. रुग्णांची स्थिती वाईट होती. या सगळ्या गोष्टी राजीव यांनी त्यांच्या यूट्यूब चॅनलमधून समोर आणल्या. संबंधित अधिकाऱ्यांचं लक्ष त्यांनी याकडे वेधलं,' असं राजीव यांच्या पत्नीनं सांगितलं.
व्हिडीओ व्हायरल झाल्यानंतर राजीव प्रताप यांना जीवे मारण्याच्या धमक्या मिळू लागल्या. धमक्या येत असल्यानं राजीव बरेच त्रासले होते. राजीव प्रताप सिंह १८ सप्टेंबरच्या रात्री ११ वाजता गंगोत्री परिसरातून रहस्यमयरित्या बेपत्ता झाले. मित्राची कार घेऊन ते गंगोत्रीला गेले होते. दुसऱ्या दिवशी त्यांची कार भागिरथी नदीत स्यूंणा गावाजवळ सापडली. त्या कारमध्ये कोणीही नव्हतं. अखेर १० दिवसांनी राजीव प्रताप यांचा मृतदेह हाती लागला. राजीव यांच्या अकाली निधनानं त्यांच्या कुटुंबावर दु:खाचा डोंगर कोसळला आहे.
