मीरा-भाईंदर महानगरपालिकेच्या महासभेत झालेल्या गोंधळामुळे राजकीय वातावरण तापलं आहे. महासभेदरम्यान पत्रकार आणि नागरिकांना मारहाण केल्याच्या आरोपावरून भाजपच्या १६ नगरसेवकांविरोधात गुन्हा दाखल करण्यात आला आहे. मोबाईलवर चित्रीकरण करण्यावरून सुरू झालेला वाद वाढल्याची माहिती समोर आली असून, या घटनेनंतर पत्रकारांनी निषेध आंदोलनही केलं. या प्रकरणामुळे महापालिका वर्तुळात खळबळ उडाली आहे.
अधिक माहिती अशी की , मीरा-भाईंदर महानगरपालिकेच्या महासभेदरम्यान प्रेक्षक गॅलरीत बसलेल्या सर्वसामान्य नागरिकांना मारहाण करण्याचा प्रयत्न झाल्याचा प्रकार समोर आला आहे. या घटनेदरम्यान वादाचे व्हिडिओ काढणाऱ्या पत्रकारांनाही मारहाण करण्याचा प्रयत्न करण्यात आल्याचा आरोप आहे. या प्रकरणी भाजपच्या १६ नगरसेवकांविरोधात भाईंदर पोलीस ठाण्यात गुन्हा दाखल करण्यात आला असून, पोलिसांकडून पुढील तपास सुरू आ
महानगरपालिकेच्या महासभेचे कामकाज सुरू असताना प्रेक्षक गॅलरीत बसलेल्या काही नागरिकांचा आणि भाजपच्या नगरसेवकांचा वाद झाला. हा वाद वाढत गेल्याने सभागृहातील वातावरण तणावपूर्ण बनले. यावेळी नगरसेवकांकडून सर्वसामान्य नागरिकांना मारहाण करण्याचा प्रयत्न झाल्याचा आरोप करण्यात येत आहे. दरम्यान, या संपूर्ण प्रकाराचे व्हिडिओ काढण्यासाठी पत्रकार पुढे आले असता, त्यांनाही नगरसेवकांकडून मारहाण करण्याचा प्रयत्न झाल्याचे सांगण्यात येत आहे.
परिस्थिती अधिक चिघळू नये यासाठी उपस्थित पोलीस कर्मचारी आणि सुरक्षा रक्षकांनी मध्यस्थी केली. त्यांच्या हस्तक्षेपामुळे अखेर वाद मिटला. मात्र, या घटनेचा निषेध नोंदवण्यासाठी काही काळ पत्रकारांनी महानगरपालिकेच्या तळमजल्याजवळ ठिय्या आंदोलन केले. या आंदोलनातून पत्रकारांनी घडलेल्या प्रकाराबाबत निषेध व्यक्त केला.
या घटनेमुळे मीरा-भाईंदर महानगरपालिकेच्या महासभेतील सुरक्षिततेचा प्रश्न पुन्हा ऐरणीवर आला आहे. दरम्यान, या प्रकरणी भाजपच्या १६ नगरसेवकांविरोधात भाईंदर पोलीस ठाण्यात गुन्हा दाखल करण्यात आला आहे. पोलिसांकडून या प्रकरणाचा पुढील तपास सुरू असून, घटनेची नेमकी पार्श्वभूमी आणि संबंधितांची भूमिका तपासानंतर स्पष्ट होणार आहे.
