राज्याचे मुख्यमंत्री देवेंद्र फडणवीस आज बीड दौऱ्यावर आहेत. मुख्यमंत्री पद स्वीकारल्यानंतर ते पहिल्यांदाच बीड दौऱ्यावर आहेत. भाजप आमदार सुरेश धस यांच्या आष्टी मतदारसंघातील खुंटेफळ साठवण तलाव प्रकल्पाचे लोकार्पण मुख्यमंत्र्यांच्याहस्ते करण्यात येत आहे. मुख्यमंत्र्यांच्या या दौऱ्यानिमित्त आमदार, बीडमधील मंत्री देखील बीडमध्ये दाखल झाले आहेत. देवेंद्र फडणवीस यांच्यासोबतच मंत्री पंकजा मुंडे याही आष्टी मतदारसंघात पोहोचल्या असून हेलिपॅडवर दोन्ही नेत्यांचं स्वागत करण्यात आलं आहे. मात्र, आजच्या कार्यक्रमाला मंत्री धनंजय मुंडे प्रकृती कारणास्तव हजर राहणार नाहीत. स्वत: धनंजय मुंडेंनी ट्विट करुन याबाबत माहिती दिली.
आमदार धस यांच्याकडून आयोजित सरकारी कार्यक्रमाला धनंजय मुंडे यांना देखील शासकीय निमंत्रण आहे. मात्र, ते जाणार नसल्याचे कालच स्पष्ट झालं होतं. ''माझ्या डोळ्यावर आज मुंबई येथे पद्मश्री डॉ.टी.पी.लहाने सर यांच्या खासगी रुग्णालयात छोटीशी शस्त्रक्रिया करण्यात आली आहे. डॉक्टरांनी पुढील चार ते पाच दिवस काळजी व विश्रांती घेण्यास सांगितले आहे. त्यामुळे पुढील पाच दिवस कृपया मला भेटता येणार नाही. सोमवारपासून मी पूर्ववत कार्यालयात सेवेत रुजू असेल,'' अशी माहिती धनंजय मुंडेंनी ट्विटरद्वारे दिली आहे. त्यामुळे, राजकीय वर्तुळात आणि बीड जिल्ह्यात चर्चांना उधाण आले आहे. त्यातच सामाजिक कार्यकर्त्या अंजली दमानिया यांनी पत्रकार परिषद घेऊन धनंजय मुंडेंवर भ्रष्टाचाराचे गंभीर आरोप केल आहेत. तसेच, धनंजय मुंडेंनी मंत्रि‍पदाचा राजीनामा द्यावा, अशी मागणीही त्यांनी केलीय.
दरम्यान, आज मुख्यमंत्री बीड दौऱ्यावर असल्याने बीडकडेही सर्वांच्या नजरा लागल्या आहेत. बीडमधील सरपंच संतोष देशमुख यांच्या हत्येनंतर बीड जिल्ह्यातील सामाजिक व राजकीय वातावरण तणावग्रस्त झाल्याचं दिसून येत आहे.
