२०२६ वर्ष येण्यासाठी अवघे काही दिवस शिल्लक राहिले आहे. २०२५ मध्ये अनेक चांगल्या, वाईट घटना जगात घडल्या. २०२६ देखील मोठे आव्हान अनेक देशांसाठी घेऊन येऊ शकते. सुरक्षा क्षेत्रातील जाणकार मंडळी आगामी वर्षात नवीन संकट घेऊन येण्याची शक्यता वर्तवत आहेत.  काही देशांमध्ये युद्ध पेटण्याची शक्यता आहे. तसेच वादग्रस्त निवडणुका, प्रादेशिक युतींमध्ये बदल आणि वाढत्या लष्करी हालचालींमुळे नवीन भू-राजकीय तणाव निर्माण होण्याची शक्यता नाकारता येत नाही.

ACLED (सशस्त्र संघर्ष स्थान आणि घटना डेटा) नुसार, जगातील बऱ्याच भागांमध्ये हिंसाचार वाढला आहे. यामागे लहान सशस्त्र गट, टोळ्या आणि युती ही कारणे आहेत. त्यामुळे सागरी सुरक्षा, स्थलांतर आणि जागतिक राजकारणावर खोलवर परिणाम होऊ शकतो. आगामी वर्षात पुढील ठिकाणी युद्ध होण्याची शक्यता आहे.

रशिया आता युक्रेनच्या डोनेस्तकमध्ये मोठी लष्करी कारवाई करत असून या शहरांवर लांब पल्ल्याच्या क्षेपणास्त्रांनी हल्ला करत आहे. त्यामुळे हा संघर्ष आणखी वाढू शकतो.

2025 मध्ये इस्रायल आणि इराणमध्ये युद्ध झाले होते. इस्रायलला आता गाझा, लेबनॉन, सीरिया आणि इराणसह अनेक ठिकाणी तणावाचा सामना करावा लागत आहे. इराण आपल्या लष्करी आणि आण्विक क्षमतांचा विस्तार करत आहे त्यामुळे या दोन्ही देशांमध्ये युद्ध होण्याची शक्यता नाकारता येत नाही.

2026 मध्ये लॅटिन अमेरिका हा सर्वात अस्थिर प्रदेश असण्याची शक्यता आहे. व्हेनेझुएलातील राजकीय तणाव आणि अमेरिकेच्या हस्तक्षेपामुळे परिस्थिती बिघडत चालली आहे. यामुळे बोलिव्हिया, कोस्टा रिका, पेरू, ब्राझील, कोलंबिया आणि चिलीसह अनेक देश सुरक्षेच्या नावाखाली लष्कराची ताकद वाढवत आहेत. यामुळे हिंसाचार होण्याचा धोका वाढला आहे. इक्वेडोर हा या प्रदेशातील एक प्रमुख हॉटस्पॉट बनला आहे, जिथे हिंसाचार, तुरुंगातील उठाव आणि ड्रग्ज नेटवर्क देशाला अस्थिर करण्याचा प्रयत्न करत आहे.

म्यानमारमध्ये लष्कर निवडणुका घेऊन सत्तेवरील आपली पकड मजबूत करण्याचा प्रयत्न करत आहे. मात्र जनतेचा आणि बंडखोर गटांचा याला विरोध आहे. चीनच्या पाठिंबा असूनही, देशात हिंसाचार आणि अराजकता वाढण्याची शक्यता आहे. पाकिस्तानमध्ये, तहरीक-ए-तालिबान पाकिस्तान (टीटीपी), बलुच बंडखोरी आणि अफगाण सीमेवरील तणाव वाढण्याची शक्यता आहे.

साहेल प्रदेशात आयसिस आणि अल-कायदाशी संबंधित संघटनांचा विस्तार होत आहे. सुदानमधील एसएएफ (सुदान सशस्त्र दल) आणि आरएसएफ (रॅपिड सपोर्ट फोर्सेस) यांच्यातील तणाव वाढला आहे. त्यामुळे 2026 मध्ये या ठिकाणीही तणाव वाढण्याची शक्यता आहे.