सोलापूरमधून एक खळबळजनक घटना समोर आली आहे. सोलापूरमधील पोलीस प्रशिक्षण केंद्रात तब्बल १७० प्रशिक्षणार्थी पोलिसांना अन्नातून विषबाधा झाल्याची धक्कादायक आणि तितकीच गंभीर घटना समोर आली आहे. सोलापूर पोलीस प्रशिक्षण केंद्रात सध्या जवळपास १,४०० प्रशिक्षणार्थी प्रशिक्षण घेत आहेत. बाधित सर्व प्रशिक्षणार्थींना तातडीने सोलापूर शासकीय रुग्णालयात दाखल करण्यात आले असून त्यांच्यावर उपचार सुरू आहेत.
मिळालेल्या माहितीनुसार काल सायंकाळच्या सत्रात अनेक प्रशिक्षणार्थींना उलटी, जुलाब आणि मळमळ होण्याचा त्रास जाणवला. त्यानंतर एकामागून एक प्रशिक्षणार्थी आजारी पडत गेल्याने वैद्यकीय उपचारासाठी रुग्णालयात हलविण्यात आले. १७ जणांवर विशेष उपचार सुरू आहेत, तर उर्वरितांची प्रकृती स्थिर असल्याचे रुग्णालय प्रशासनाने सांगितले.
