बिहारचे मुख्यमंत्री नितीश कुमार यांचा एक व्हिडिओ सोशल मीडियावर चांगलाच व्हायरल झाला आहे. ज्यात त्यांनी केलेल्या एका कृत्याचा अनेकांकडून संताप व्यक्त करण्यात येत आहे. या व्हिडिओमध्ये नितीश कुमार यांनी एका डॉक्टर मुस्लिम महिलेसोबत विचित्र कृत्या केल्याचे पाहायला मिळत आहे. व्हिडिओत नितीश कुमार हे डॉक्टर महिलेला नियुक्तीपत्र देताना तिच्या चेहऱ्यावरील हिजाब (नकाब) खेचताना दिसत आहेत.
पाटण्यातील मुख्यमंत्री सचिवालयातील 'संवाद' इमारतीत आयोजित नियुक्तीपत्र वितरण कार्यक्रमात ही घटना घडली. या कार्यक्रमात आयुष डॉक्टरांना नियुक्तीपत्र देण्यात येत होते, त्यापैकी काहींना मुख्यमंत्री स्वतः पत्र देत होते. व्हिडिओनुसार, महिला डॉक्टर नुसरत परवीन (किंवा नुसरत प्रवीण) नियुक्तीपत्र घेण्यासाठी मंचावर आल्या. त्या हिजाब घालून होत्या.
नीतीश कुमार यांनी त्यांना पत्र दिल्यानंतर "हे काय लावलंय?" असा प्रश्न विचारला आणि त्यांच्या उत्तराची वाट न पाहता स्वतः हिजाब खेचून खाली केला. यावेळी मंचावर उपस्थित काही अधिकारी हसताना दिसले, तर उपमुख्यमंत्री सम्राट चौधरी यांनी नीतीश कुमार यांना रोखण्याचा प्रयत्न केला. यावेळी महिला डॉक्टर काही क्षण अस्वस्थ दिसल्या.
या घटनेने बिहारच्या राजकारणात मोठा गदारोळ माजला आहे. विरोधी पक्षांनी, विशेषतः राष्ट्रीय जनता दल (RJD) आणि काँग्रेसने नीतीश कुमार यांच्यावर जोरदार हल्ला चढवला आहे.
