कार्यसम्राट आमदार म्हणून ओळख मिळवणारे नांदगाव विधानसभा मतदारसंघाचे आमदार सुहास कांदे यांची ताकद आणखी वाढली आहे. ‘प्रभारी जिल्हा संघटन प्रमुख, नाशिक जिल्हा’ या नव्याने स्थापन करण्यात आलेल्या पदावर सुहास कांदे यांची नियुक्ती करण्यात आली आहे. मुंबई येथे झालेल्या उच्चस्तरीय बैठकीत एकनाथ शिंदे यांच्या उपस्थितीत ही नियुक्ती अधिकृतपणे घोषित करण्यात आली.
शिवसेनेच्या संघटन रचनेत प्रथमच "प्रभारी जिल्हा संघटन प्रमुख" हे पद निर्माण करण्यात आले असून, हे पद सर्व जिल्हा प्रमुखांच्या वरच्या स्तरावरचे मानले जात आहे. यामागील प्रमुख उद्दिष्ट म्हणजे आगामी नगरपरिषद, नगरपालिका, जिल्हा परिषद व महापालिकांच्या निवडणुकांच्या पार्श्वभूमीवर संघटना अधिक बळकट करणे, रणनीती आखणे व कार्यपद्धती एकसंध करणे, असे आहे. सुहास कांदे यांच्या या नियुक्तीमुळे मतदारसंघासह, पदाधिकारी आणि कार्यकर्त्यांमध्ये आनंदाचे वातावरण आहे.
शिवसेना ही सत्ता नव्हे, तर सेवा आहे आणि सेवा हीच माझी खरी ओळख
याबाबत आमदार सुहास कांदे म्हणाले की, ही नियुक्ती केवळ पद नाही, तर प्रत्येक शिवसैनिकाच्या त्यागाचा आणि निष्ठेचा सन्मान आहे. नाशिक जिल्हा हा शिवसेनेचा गड आहे. बाळासाहेबांच्या विचारांचा आणि एकनाथ शिंदे साहेबांच्या नेतृत्वाचा आधार घेत, तळागाळातील प्रत्येक शिवसैनिकाशी थेट संपर्क ठेवत आपण स्थानिक स्वराज्य संस्थांच्या निवडणुकांमध्ये भगवा झेंडा उंच फडकवू. शिवसेना ही सत्ता नव्हे, तर सेवा आहे आणि सेवा हीच माझी खरी ओळख राहील. सर्व कार्यकर्त्यांच्या सहकार्याने नाशिक जिल्हा हे शिवसेनेच्या संघटनशक्तीचे आदर्श उदाहरण बनवू," असे त्यांनी म्हटले आहे.
