नांदगाव (भ्रमर वार्ताहर) - तालुक्यातील हिसवळˆबेजगाव रस्त्यावर शाळेत जाणार्या अल्पवयीन मुलीचा पाठलाग करून तिचा हात धरून गैरकृत्याचा प्रयत्न केल्याची धक्कादायक घटना घडली असून, या प्रकरणी साधूवेशातील दोन इसमांविरुद्ध नांदगाव पोलीस ठाण्यात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, बेजगाव (ता. नांदगाव) येथे राहणारी अल्पवयीन विद्यार्थीनी सोमवारी सकाळी 9.30 वाजेच्या सुमारास शाळेचा गणवेश घालून दप्तरासह मैत्रीणीसमवेत पायी शाळेत जात होती. त्यावेळी जाधव वस्ती परिसरात, हिसवळ बाजूकडून मोटारसायकलवर आलेले साधूसारखे भगवे वस्त्र परिधान केलेले दोन इसम मुलींकडे पाहत पुढे गेले. काही अंतर गेल्यानंतर या इसमांनी मोटारसायकल परत फिरवून पुन्हा मुलींच्या दिशेने येत रस्त्यावर गाडी उभी करून त्यातील एक जण खाली उतरला.
हे पाहून दोन्ही मुली घाबरून हिसवळच्या दिशेने धावू लागल्या. त्यावेळी तो इसम त्यांच्या मागे धावला. दरम्यान, त्या इसमाने मुलीचा हात पकडून तिला ओढण्याचा प्रयत्न केला. यावेळी तिच्या मैत्रिणीने धाडस दाखवत आरडाओरडा केल्याने तो इसम घाबरून तेथून पसार झाला. त्याचवेळी गावातील मच्छिंद्र खाडे हे मोटारसायकलवरून येत असल्याने मुली त्यांच्या गाडीवर बसून हिसवळ येथील शाळेजवळ उतरल्या. भीतीमुळे त्यांनी तत्काळ घटना कुणालाही सांगितली नाही. नंतर त्या मुलींनी आपल्या वडिलांना फोन करून घडलेला प्रकार सांगितला. त्यानंतर शाळेत मुख्याध्यापकांना माहिती दिल्यानंतर ग्रामस्थांच्या मदतीने बेजगाव परिसरातून या दोन्ही इसमांना पकडण्यात आले.
सुरेश तुकाराम जगताप (रा. गोसावीवाडी, दत्तनगर, पहुरकसबे, ता. जामनेर, जि. जळगाव) आणि नारायण दादाराव शिंदे (रा. बाबरनगर, अंबड, ता. अंबड, जि. जालना) अशी पोलिसांनी ताब्यात घेतलेल्या दोघा इसमांची नावे आहेत. या प्रकरणी पीडित अल्पवयीन मुलीच्या फिर्यादीवरुन नांदगाव पोलीस ठाण्यात गुन्हा दाखल करण्यात आला आहे. पुढील तपास पोलीस उपनिरीक्षक संतोष बहाकर करीत आहेत.
