बांगलादेश भूकंपाच्या धक्क्याने हादरले असून याठिकाणी सहा जणांचा मृत्यू झाला आणि 200 हून अधिक जण जखमी झाले. भूकंपाचे केंद्र ढाक्यापासून फक्त 25 किलोमीटर अंतरावर असलेल्या नरसिंगडी येथील माधाबादीत होते. भूकंपाचा धक्का इतका जोरदार होता की दहा मजली इमारत एका बाजूला झुकली. बांगलादेशमध्ये सुरू असलेला बांगलादेश-आयर्लंड आंतरराष्ट्रीय क्रिकेट सामनाही थांबवण्यात आला.
शुक्रवारी सकाळी बांगलादेशमध्ये ५.६ रिश्टर स्केल तीव्रतेचे भूकंपाचे धक्के बसले. या भूकंपाचे हादरे भारतातील कोलकातापर्यंत बसले. भूकंपाचे हादरे बसल्यामुळे अनेक ठिकाणी घरं कोसळून मोठे नुकसान झाले. बांगलादेशमध्ये भूकंपाचे धक्के बसण्यापूर्वी पाकिस्तान आणि अफगाणिस्तानमध्ये भूकंपाचे धक्के बसले.
दरम्यान, आज पहाटे पाकिस्तानमध्ये भूकंपाचे धक्के जाणवले. पहाटे ३ वाजून ९ मिनिटांनी भूकंपाचे हादरे बसले. या भूकंपाची तीव्रता ५.२ रिश्टर स्केल इतकी होती. भूकंपाचे केंद्र पाकिस्तानमध्ये सुमारे १३५ किलोमीटर खोलवर होते. राष्ट्रीय भूकंपशास्त्र केंद्राच्या मते, गुरुवार-शुक्रवार रात्री हिंदी महासागरातही ४.३ रिश्टर स्केल तीव्रतेचे भूकंपाचे धक्के बसले.
गाझीपूरमधील श्रीपूर येथे भूकंपादरम्यान एक मोठा अपघात झाला. बहुमजली इमारतीतून बाहेर पडण्याचा प्रयत्न करणाऱ्या घाबरलेल्या कामगारांनी चेंगराचेंगरी केली, ज्यामुळे 150 हून अधिक कामगार जखमी झाले. डेनिमेक नावाच्या कापड कारखान्यात ही घटना घडली. जखमींना श्रीपूर उपजिल्हा आरोग्य केंद्रात दाखल करण्यात आले आहे.
भूकंप झाल्यानंतर अधिकाऱ्यांनी कारखान्याचे मुख्य गेट उघडण्यास नकार दिल्याची तक्रार कामगारांनी केली आहे, ज्यामुळे घबराट पसरली आणि त्यामुळे अधिक जखमी झाले.
