नंदुरबार जिल्ह्यातील शनिमांडळ येथील शनी मंदिर देशातील एकमेव साडेसाती मुक्तपीठ म्हणून ओळख आहे. अनेक राजकीय नेत्यांनी आपल्या जीवनाची राजकीय सुरुवात याच मंदिराच्या दर्शनापासून केली आहे. शनी देव हा राजकीय क्षेत्राचा गुरु असल्याने त्यामुळे अनेक राजकीय नेते या ठिकाणी येऊन गेले आहेत. संकटात सापडलेल्या राजकीय नेत्यांना या ठिकाणाहून ऊर्जा मिळत असते.
आता संकटामध्ये सापडलेल्या राज्याचे कृषिमंत्री माणिकराव कोकाटे यांनी शनिदेवाच्या चरणी धाव घेतली आहे.माणिकराव कोकाटे नंदुरबार जिल्ह्याच्या दौऱ्यावर आहे. शेतकऱ्यांबद्दलचे वक्तव्य आणि विधीमंडळात पत्ते खेळतानाचा व्हायरल झालेला व्हिडिओ यामुळे माणिकराव कोकाटे जोरदार चर्चेत आहेत. विरोधकांकडून त्यांच्या राजीनाम्याची मागणी केली जात आहे. मंगळवारी या संदर्भात महत्त्वाच्या घडामोडी घडण्याची शक्यता वर्तवली जात आहे.
मागे लागलेला तसेमिरा सुटावा आणि आरोप थांबावे यासाठी मंत्री कोकाटे यांनी शनिदेवाला साकडं घातलं आहे. भाविकांची अशी भावना आहे की शनिवारी शनिदेवाची साडेसाती मुक्ती ठिकाणी पूजा केल्याने मागे लागलेली इडापीडा दूर होते. मंत्री माणिकराव कोकाटे यांनी साडेसाती पासून मुक्ती मिळावी व विरोधकांच्या आरोपांपासून सुटका व्हावी म्हणून साडेसाती मुक्ती स्थळ म्हणून प्रसिद्ध असलेल्या शनिमांडळ येथील शनि महाराज मंदिरात अभिषेक आणि पूजा अर्चा करून विरोधकांवर विजय मिळावा अशी प्रार्थना केली आहे.
