हतबल शेतकऱ्यांची अवस्था कोणापासून लपून राहिलेली नाही. हतबल शेतकरी आत्महत्या करत आहे, पण आत्महत्या थांबाव्या यासाठी ठोस उपाययोजना करताना सरकार काही दिसत नाही. बऱ्याचदा पीक विमा काढून देखील नुकसान भरपाई मिळत नाही, अशाच एका घटनेचा शेतकऱ्याने अनोख्या पद्धतीने निषेध नोंदवला आहे.
पीक विमा भरपाई नाकारल्याने राजस्थानच्या नागौर जिल्ह्यातील एका शेतकऱ्याने निषेध नोंदवत थेट शेतात ५०० रुपयांच्या नोटा पेरल्या. या माध्यमातून त्याने नैसर्गिक आपत्तींमुळे शेतकऱ्यांना सामोरे जावे लागणाऱ्या आव्हानांत्मक परिस्थितीकडे लक्ष वेधून घेण्याचा प्रयत्न केला आहे.या प्रसंगाचा व्हिडिओ स्वतः शेतकऱ्याने काढला. हा व्हिडिओ सोशल मीडियावर मोठ्या प्रमाणात व्हायरल झाला आहे.
नागौर जिल्ह्याच्या देवरिया जाटान गावातील रहिवासी मल्ला राम बावरी यांनी त्यांच्या शेतात कापूस पीक घेण्यासाठी बँकेकडून १ लाख रुपयांचे कर्ज घेतले होते. पण, अतिवृष्टीमुळे त्यांच्या शेतात पाणी साचल्याने कापूस पिकाचे नुकसान झाले. यातून त्यांना केवळ ४ हजार रुपयांचे उत्पन्न मिळाले. त्यांनी त्यांच्या पिकाचा विमा उतरवला होता. असे असूनही, त्यांना कोणतीही भरपाई मिळाली नाही, असा बावरी यांचा दावा आहे.
सरकारी यंत्रणा आणि विमा कंपनीकडून त्यांची दखल घेतली जात नसल्याने नाराज झालेल्या बावरी यांनी याचा प्रतिकात्मक निषेध नोंदवला. ज्या शेतातील त्यांचे पीक नष्ट झाले होते; तिथे त्यांनी ५०० रुपयांच्या नोटा पेरल्या. हा व्हिडिओ सोशल मीडियावर व्हायरल झाला आहे. "यंत्रणेवर प्रश्नचिन्ह उपस्थित करत शेतकऱ्यांना कोणत्या परिस्थितीला सामोरे जावे लागत असल्याचे निदर्शनास आणून देण्यासाठी अशापद्धतीने प्रतिकात्मक निषेध नोंदवला," असे शेतकरी मल्ला राम बावरी यांनी म्हटले आहे.
