CJP स्थापन झाल्यापासून ते दिल्लीतील नीट घोटाळ्यावरून आंदोलन आणि धर्मेंद्र प्रधान यांचा राजीनामा या सर्व घडामोडींपासून अभिजित दिपके यांची सर्वत्र चर्चा आहे. दरम्यान आता अभिजित दिपके यांच्या विषयी मोठी अपडेट समोर आली आहे.
सोशल मीडिया इन्फ्लूएन्सर दिल्लीत फैजान अन्सारी यांनी CJP संस्थापक अभिजीत दीपके यांच्या विरोधात दिल्ली पोलिसांकडे तक्रार दाखल केली आहे. दीपके यांच्या सहकाऱ्यांनी आपल्यावर हल्ला केल्याचा आरोप अन्सारी यांनी केला आहे. या प्रकरणी दीपके यांना तात्काळ अटक करावी, अशी मागणीही त्यांनी केली आहे.
मिळाेल्या माहितीनुसार, अन्सारी यांनी सांगितले की, “मी अभिजीत दीपके यांच्या विरोधात दिल्ली पोलीस उपायुक्तांकडे तक्रार दाखल केली आहे. अभिजीत दीपके यांच्या सहकाऱ्यांनी माझ्यावर हल्ला केला. त्याचा पुरावा देखील माझ्याकडे आहे. त्यामुळे त्याला तातडीने अटक व्हावी अशी देखील मागणी केली आहे.”
तसेच पुणे आणि छत्रपती संभाजीनगरमध्येही आपल्यावर हल्ले झाल्याचे त्यांनी सांगितले. या घटनांशी संबंधित दोन गुन्हे पोलिसांत दाखल असल्याचा दावा त्यांनी केला आहे.
दरम्यान, आंदोलनावेळी पोलिसांनी केलेल्या कारवाईचे अन्सारी यांनी कौतुक केले. “मी दिल्लीच्या मुख्यमंत्री आणि पोलिसांना सॅल्यूट करतो. त्यांनी दिल्लीतील वातावरण बिघडू दिले नाही,” असे ते म्हणाले. अभिजीत दीपके हे स्वतःच्या हितासाठी सर्व करत असल्याचा आरोपही त्यांनी केला.
