कोरोना महामारीनंतर सर्वच जण आरोग्याकडे विशेष लक्ष देत आहे. शरीराची काळजी घेण्यासाठी जिम , योगा, आहार याकडे विशेष लक्ष देत आहे. पण हा सर्व करूनही आरोग्यावरील वैश्विक संकट सध्या सर्वांसाठी डोकेदुखी ठरत आहे. अवतीभोवती असलेली व्यक्ती आनंदी जरी दिसत असली तरी ती आतून दु:खाने ग्रासलेली, एकाकीपणाने वेढलेली असू शकते. त्यामुळे एकटेपणा ही बाब आता फक्त भावनात्मक स्थिती राहिलेली नाही. एकाकीपणा हे वैश्विक पातळीवरचं आरोग्यविषयक संकट म्हणून समोर आले आहे. हीच बाब लक्षात घेऊन जागतिक आरोग्य संघटनेने 2023 साली एकाकीपणाला आरोग्यावरील वैश्विक संकट म्हणून जाहीर केले आहे.
एकाकीपणाचे घातक परिणाम
तज्ज्ञांच्या मते एकाकीपणामुळे मानसिक स्वास्थ बिघडते. सोबतच याचा शारीरिक स्वास्थ्यावरही परिणाम पडतो. अमेरिकेतील तज्ज्ञांच्या मते एकाकपीणामुळे शरीरावर होणारा परिणाम हा प्रतिदिन 15 सिगारेट ओढण्याएवढा घातक आहे. एकाकीपणामुळे डिप्रेशन, एग्झांयटी, आत्महत्येला प्रवृत्त होणे, हृदयरोग यासारख्या अडचणी येतात. आश्चर्यकारक बाब म्हणजे एकाकीपणाच्या समस्येमुळे प्रत्येक तासाला 100 लोकांचा मृत्यू होत आहे.
प्रत्येक सहावी व्यक्ती एकाकीपणाने ग्रासलेली
एकाकीपणा आणि त्यातून येणाऱ्या अडचणी लक्षात घेऊन जागतिक आरोग्य संघटनेने एक आंतरराष्ट्रीय आयोगाची स्थापना केलेली आहे. एका रिपोर्ट्सनुसार जगातील प्रत्येक सहावी व्यक्ती एकाकीपणाने ग्रासलेली आहे. म्हणजेच काही लोक हे रोज अनेकांच्या संपर्कात येत असले तरी ते आतून एकाकीपणाशी झुंज देत आहेत.
एकाकीपणाने तरुणही ग्रासलेले
एका रिपोर्टनुसार जगात 5 ते 15 टक्के किशोरवयीन मुलं एकाकीपणाच्या समस्येतून जात आहेत. आफ्रिकेत हा आकडा 12.7 टक्के आहे. तर युरोपात 5.3 टक्के किशोरवयीन मुलं एकाकीपणाच्या अडचणीतून जात आहेत. त्यामुळे एकाकीपणाला दूर घालवण्यासाठी नेमकं काय करायला हवं? असा सवाल उपस्थित केला जातोय.
नेमकं काय करायला हवं?
दरम्यान, तुम्हालाही एकाकीपणाची समस्या जाणवत असेल तर त्याकडे गांभीर्याने पाहा. तुमच्या मित्रांसोबत, नातेवाईकांसोबत वेळ घालवा. मानसोपचार तज्ज्ञांची मदत घ्या. सोबतच सोशल मीडियासारख्या आभासी जगापासून दूर होऊन प्रत्यक्ष लोकांमध्ये मिसळायला हवे.
