मुंबई सेंट्रल रेल्वे स्थानकाच्या जवळ २२ डिसेंबर रोजी पहाटे ५ वाजण्याच्या सुमारास भाऊसाहेब हिरे पार्कमध्ये एक संतापजनक घटना घडली. १८ वर्षीय गतीमंद तरुणीशी गैरवर्तन करण्याच्या आरोपात चक्क एका सहाय्यक पोलीस उपनिरीक्षकाला अटक करण्यात आली आहे. तरुणीशी गैरवर्तन केल्याच्या या घटनेचा व्हिडिओ सोशल मीडियावर व्हायरल झाल्यानंतर पोलिसांकडून कारवाई करण्यात आली.
सहाय्यक पोलीस उपनिरीक्षक संजय राणे याला गतीमंद तरुणीसोबत गैरवर्तन केल्याच्या आरोपाखाली अटक करण्यात आली आहे. पोलिसांनी व्हिडिओची सत्यता पडताळून पाहिली आणि त्याच्यावर कारवाई केली. संजय राणे हा सशस्त्र विभागात कार्यरत होता. या घटनेमुळे पोलीस दलात अंतर्गत आणि फौजदारी चौकशी सुरु करण्यात आली आहे.
पोलिसांनी दिलेल्या माहितीनुसार, ही घटना मुंबई सेंट्रल रेल्वे स्थानकाजवळ असलेल्या भाऊसाहेब हिरे पार्कमध्ये घडली. त्यावेळी आरोपी पोलिसांच्या गणवेशात होता. पीडित तरुणी मानसिकदृष्ट्या अस्थिर असून आरोपी तिला पार्कमध्ये भेटला.
"मॉर्निंग वॉकला येणाऱ्या नागरिकांनी हा प्रकार पाहून आरडाओरडा केला आणि आरोपीजवळ धाव घेतली. आम्ही घटनास्थळी पोहोचण्यापूर्वीच काही जणांनी त्याला शिवीगाळ आणि मारहाणही केली" असे एका अधिकाऱ्याने सांगितले. आरोपी सहाय्यक पोलीस उपनिरीक्षक संजय राणे घटनेच्या वेळी दारूच्या नशेत होते का, याचीही पोलीस चौकशी करत आहेत.
पोलिसांनी स्पष्ट केले की, आरोपीला अडवणाऱ्या नागरिकांविरुद्ध कोणतीही एफआयआर नोंदवण्यात आलेली नाही. "आतापर्यंत आम्ही जमावाविरुद्ध कोणतीही एफआयआर नोंदवलेली नाही. दोन व्हिडिओ व्हायरल झाले आहेत. आम्ही लोकांना विनंती करतो की अफवा पसरवू नये, कारण आरोपीला अटक करण्यात आली आहे" असे अधिकाऱ्याने सांगितले. सहाय्यक उपनिरीक्षकाच्या विरुद्ध छेडछाडीचा गुन्हा दाखल करण्यात आला आहे. ताडदेव पोलीस या प्रकरणाचा तपास करत आहेत.
