अनेक दिवसांपासून Flipkart च्या Big Billion Day Sale ची ग्राहक वाट पाहत होते. भन्नाट ऑफर असल्याने Big Billion Day Sale कडे सर्वांच्याच नजरा लागल्या होत्या. २२ सप्टेंबरला Flipkart Black आणि Plus सदस्यांसाठी सेल सुरू झाला, तर २३ सप्टेंबरपासून सर्वांसाठी खुला झाला.अखेर Big Billion Day Sale सुरु झाली आणि ग्राहक खरेदीसाठी सज्ज झाले.
यावर्षी सेलमध्ये सर्वाधिक चर्चेत असलेली ऑफर म्हणजे iPhone 16 आणि iPhone 16 Pro वरील सवलत होती. कमी किमतीत आयफोन मिळण्याची संधी मिळत असल्याने हजारो ग्राहकांनी ऑर्डर दिल्या. पण काही तासांतच त्या ऑर्डर रद्द झाल्याने संताप व्यक्त केला जात आहे. Flipkart ने सेलमध्ये iPhone 16 (128GB) ₹51,999 तर iPhone 16 Pro (128GB) ₹69,999 ला उपलब्ध असल्याचे जाहीर केले. हा दर ऐकून ग्राहकांनी उत्साहात खरेदी केली.
काही ग्राहकांनी अर्ध्या रात्रीच ऑर्डर दिल्या. पूर्ण पेमेंट करून कन्फर्मेशनही मिळाले. मात्र, काही तासांत Flipkart ने त्या ऑर्डर रद्द केल्या. या घटनेनंतर सोशल मीडियावर Flipkart विरोधात संताप व्यक्त होत आहे. एका वापरकर्त्याने लिहिले, “तीन पूर्ण पेमेंट ऑर्डर दिल्या होत्या, पण चार तासांत सगळ्या रद्द झाल्या. हा घोटाळाच आहे.” तर दुसऱ्याने तक्रार केली, “ऑर्डर यशस्वी झाल्या होत्या, पण सकाळी कोणतंही कारण न देता रद्द केल्या. Flipkart ग्राहकांची थट्टा करत आहे.”
Flipkart कडून नेमकं काय चाललंय याबद्दल पारदर्शक माहिती दिली जात नसल्याची खंत ग्राहक व्यक्त करत आहेत.या समस्येचा सामना फक्त अॅपल खरेदीदारांनाच करावा लागला नाही - गुगल पिक्सेल 9, नथिंग फोन 3 आणि आयफोन 14 खरेदी करण्याचा प्रयत्न करणाऱ्या ग्राहकांनीही काही मॉडेल्सवर अशाच प्रकारच्या रद्दीकरणांची आणि अचानक किमतीत वाढ झाल्याची तक्रार केली.
